ഒന്നര ലക്ഷത്തോളം തൊഴിൽ വിസകൾ ഉപയോഗിച്ചില്ല
റിയാദ് - സ്വകാര്യ മേഖലക്ക് ലഭിച്ച ഒന്നര ലക്ഷത്തോളം തൊഴിൽ വിസകൾ ഉപയോഗിച്ചില്ലെന്ന് തൊഴിൽ, സാമൂഹിക വികസന മന്ത്രാലയത്തിന്റെ കണക്ക്. തൊഴിൽ വിസക്കായി കമ്പനികൾ പരക്കം പാഞ്ഞിരുന്ന കാലത്തുനിന്നാണ് ഈ മാറ്റം.
നടപ്പുവർഷം ആദ്യ പകുതിയിൽ സ്വകാര്യ മേഖലക്ക് 1,91,584 വിസകളാണ് അനുവദിച്ചിരുന്നത്. ഇതിൽ 77 ശതമാനം വിസകളും യഥാസമയം ഉപയോഗിച്ചില്ല. 1,48,073 വിസകളാണ് ആദ്യ പകുതിയിൽ സ്വകാര്യ മേഖലകൾ ഉപയോഗിക്കാതിരുന്നത്. അനുവദിച്ച വിസകളിൽ 93 ശതമാനവും പുരുഷ ജീവനക്കാരെ റിക്രൂട്ട് ചെയ്യുന്നതിനായിരുന്നു. ജനുവരി ഒന്നു മുതൽ ജൂൺ 30 വരെയുള്ള കാലത്ത് പുരുഷ ജീവനക്കാർക്ക് 1,77,681 വിസകളും വനിതാ ജീവനക്കാർക്ക് 13,903 വിസകളുമാണ് മന്ത്രാലയം അനുവദിച്ചത്.
ലഭ്യമായ വിസകളിൽ 3,317 വിസകൾ സ്വകാര്യ സ്ഥാപനങ്ങൾ റദ്ദാക്കി. പകുതിയിലേറെ വിസകളും ഉപയോഗിച്ചത് റിയാദ് പ്രവിശ്യയിലെ സ്വകാര്യ സ്ഥാപനങ്ങളാണ്. റിയാദിലെ സ്ഥാപനങ്ങൾ 21,133 വിസകൾ ഉപയോഗിച്ചു. ആറു മാസത്തിനിടെ ആകെ ഉപയോഗിച്ച വിസകളിൽ 52.5 ശതമാനവും റിയാദ് പ്രവിശ്യയിലെ സ്ഥാപനങ്ങളാണ് ഉപയോഗിച്ചതെന്ന് തൊഴിൽ, സാമൂഹിക വികസന മന്ത്രാലയത്തിന്റെ കണക്കുകൾ വ്യക്തമാക്കുന്നു. കഴിഞ്ഞ വർഷത്തെ അപേക്ഷിച്ച് നടപ്പുവർഷം സ്വകാര്യ മേഖലക്ക് അനുവദിച്ച തൊഴിൽ വിസകളിൽ വലിയ കുറവുണ്ട്. 2016 ൽ സ്വകാര്യ മേഖലാ സ്ഥാപനങ്ങൾക്ക് ആകെ 14 ലക്ഷം വിസയാണ് അനുവദിച്ചത്. എന്നാൽ ഈ വർഷം ആദ്യ പകുതിയിൽ ആകെ രണ്ടു ലക്ഷത്തിൽ താഴെ വിസകൾ മാത്രമാണ് സ്വകാര്യ മേഖലാ സ്ഥാപനങ്ങൾക്ക് അനുവദിച്ചത്. 2015 ൽ 19.7 ലക്ഷം തൊഴിൽ വിസകൾ സ്വകാര്യ സ്ഥാപനങ്ങൾക്ക് അനുവദിച്ചിരുന്നു. കഴിഞ്ഞ വർഷം സ്വകാര്യ മേഖലക്ക് അനുവദിച്ച വിസകളിൽ 29 ശതമാനമാണ് കുറവ്. മൂന്നു വർഷത്തിനിടെ ആദ്യമായാണ് കഴിഞ്ഞ വർഷം തൊഴിൽ വിസകളുടെ എണ്ണത്തിൽ കുറവ് രേഖപ്പെടുത്തിയത്.
സ്വകാര്യ മേഖലയിലെ തൊഴിലാളികൾക്ക് അനുവദിച്ച വർക്ക് പെർമിറ്റുകളുടെ എണ്ണം ഏഴു വർഷത്തിനു ശേഷം കഴിഞ്ഞ കൊല്ലം ആദ്യമായി മൂന്നു ശതമാനം കുറഞ്ഞതായും തൊഴിൽ, സാമൂഹിക വികസന മന്ത്രാലയം അറിയിച്ചിട്ടുണ്ട്. കഴിഞ്ഞ വർഷം 82.5 ലക്ഷം വർക്ക് പെർമിറ്റുകളാണ് മന്ത്രാലയം അനുവദിച്ചത്. സ്‌പോൺസർഷിപ്പ് മാറ്റിയ തൊഴിലാളികളുടെ എണ്ണത്തിലും കഴിഞ്ഞ വർഷം 21 ശതമാനം കുറവുണ്ടായി. 2016 ൽ 4,80,000 വിദേശ തൊഴിലാളികളാണ് മറ്റു സ്ഥാപനങ്ങളുടെ പേരിലേക്ക് സ്‌പോൺസർഷിപ്പ് മാറ്റിയത്.
