ന്യൂദൽഹി- യെമനിൽ ഭീകരരുടെ പിടിയിൽ നിന്നു മോചിനായ ഫാ. ടോം ഉഴുന്നാലിൽ ഡൽഹിയിലെത്തി. വത്തിക്കാനിൽ നിന്നു എയർ ഇന്ത്യ വിമാനത്തിൽ രാവിലെ രാവിലെ 7.40ന് ഫാ. ടോം ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ എത്തിയ ടോമിനെ കേന്ദ്ര ടൂറിസം മന്ത്രി അൽഫോൻസ് കണ്ണന്താനം, എംപിമാരായ കെ.സി വേണുഗോപാൽ, ജോസ് കെ. മാണി, ഫരീദാബാദ് ആർച്ച്ബിഷപ് മാർ കുര്യാക്കോസ് ഭരണികുളങ്ങര തുടങ്ങിയവർ ടോമിനെ സ്വീകരിച്ചു. തുടർന്ന് ഓഖ്ലയിലെ ഡോൺ ബോസ്കോ ഭവനിലേക്കു പോയി. ഇപ്പോള് പ്രധാനമന്ത്രി നരേന്ദ്രമോദിയുമായി കൂടിക്കാഴ്ച്ച നടത്തുകയാണ്.
കേന്ദ്ര മന്ത്രി അൽഫോൻസ് കണ്ണന്താനം, ആർച്ച് ബിഷപ് മാർ കുര്യാക്കോസ് ഭരണികുളങ്ങര എന്നിവർക്കൊപ്പമാണ് ടോം പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തുന്നത്. തുടർന്ന് വത്തിക്കാൻ സ്ഥാനപതി ആർച്ച് ബിഷപ് ജാംബതിസ്ത ദിക്വാത്രോയുമായും കൂടിക്കാഴ്ച നടത്തും. സിബിസിഐ സെന്ററിൽ 4.30ന് മാധ്യമങ്ങളുമായി ഫാ. ടോം കൂടിക്കാഴ്ച നടത്തും. തുടർന്ന് 6.30ന് സേക്രഡ് ഹാർട്ട് കത്തീഡ്രൽ പള്ളിയിൽ ദിവ്യബലിയിൽ പങ്കുചേരും. വൈകുന്നേരം ഓഖ്ല ഡോൺബോസ്ക് ഭവനിലേക്കു മടങ്ങി അവിടെ ചെലവഴിക്കും.
വെള്ളിയാഴ്ച ബംഗളൂരിവിലേക്ക് മടങ്ങുന്ന ഫാ. ടോം സെന്റ് ജോൺസ് മെഡിക്കൽ കോളജിൽ കർദിനാൾമാരുമായും സിബിസിഐ നേതൃത്വവുമായും കൂടിക്കാഴ്ച നടത്തും. ഒക്ടോബർ ഒന്നിനു കൊച്ചിയിൽ എത്തുന്ന ഫാ. ടോം പാലാ രാമപുരത്തേക്കു പോകും. മൂന്നിന് മുഖ്യമന്ത്രി പിണറായി വിജയൻ ഉൾപ്പടെയുള്ളവരുമായും കൂടിക്കാഴ്ച നടത്തും.
