കൊല്ലം- അഞ്ചൽ ഉത്ര വധക്കേസിൽ ഭർത്താവ് സൂരജ് പിടിയിലായതോടെ ഇവരുടെ കുഞ്ഞിനെ ഉത്രയുടെ അച്ഛനും അമ്മയ്ക്കും കൈമാറാൻ തീരുമാനം.സംസ്ഥാന വനിതാ കമ്മീഷന്റെ ഇടപെടലിനെ തുടർന്നാണ് നടപടി. കൊല്ലം ബാലക്ഷേമ സമിതിയാണ് ഉത്തരവിട്ടത്.
കുഞ്ഞിന്റെ സുരക്ഷ കണക്കിലെടുത്താണ് ഇവർക്കൊപ്പം വിടുന്നതെന്ന് ബാലക്ഷേമ സമിതി അറിയിച്ചു. നിലവിൽ സൂരജിന്റെ മാതാപിതാക്കളുടെ കൂടെ കഴിയുന്ന കുട്ടിയെ വിട്ടുകിട്ടണമെന്ന് ഉത്രയുടെ കുടുംബാംഗങ്ങൾ ആവശ്യപ്പെട്ടിരുന്നു.
ഉത്ര വധക്കേസിൽ പ്രതിയായ ഭർത്താവ് സൂരജ് പിടിയിലായതോടെ കുഞ്ഞിന്റെ സംരക്ഷണത്തെ ചൊല്ലി ഉടലെടുത്ത ആശയക്കുഴപ്പത്തിനാണ് ഇതോടെ പരിഹാരമായത്. ഒരു വയസും ഒരു മാസവും പ്രായമുള്ള കുഞ്ഞിനെ വിട്ടുകിട്ടാനായി നിയമനടപടികളിലേക്ക് കടക്കാന് ഉത്രയുടെ കുടുംബം തീരുമാനിച്ചിരുന്നു.