കോഴിക്കോട്- കേരളത്തില് ഒരാള് കൂടി കോവിഡ് ബാധിച്ച് മരിച്ചു. കോഴിക്കോട് മെഡിക്കല് കോളേജ് ആശുപത്രിയില് ചികിത്സയില് കഴിഞ്ഞിരുന്ന വയനാട് കല്പറ്റ സ്വദേശിനി ആമിന(53)യാണ് മരിച്ചത്. കാന്സര് ബാധിതയായിരുന്നു.
നാല് ദിവസം മുമ്പാണ് മെഡിക്കല് കോളേജ് ആശുപത്രിയില് പ്രവേശിപ്പിച്ചത്. വിദേശത്തുനിന്ന് മടങ്ങിയെത്തിയ ഇവര് ആദ്യം സ്വകാര്യ ആശുപത്രിയില് ചികിത്സ തേടിയിരുന്നു. അവിടെ വെച്ച് കോവിഡ് ലക്ഷണങ്ങള് കണ്ടതിനെ തുടര്ന്ന് സാമ്പിള് പരിശോധനക്ക് അയക്കുകയായിരുന്നു.
രോഗം സ്ഥിരീകരിച്ചതിനു പിന്നാലെ കോഴിക്കോട് മെഡിക്കല് കോളേജില് പ്രവേശിപ്പിച്ചു. ആശുപത്രിയില് എത്തുമ്പോള് തന്നെ ഇവരുടെ ആരോഗ്യനില അതീവ ഗുരുതരമായിരുന്നു. കാന്സര് ശരീരത്തിന്റെ വിവിധ ഭാഗങ്ങളില് ബാധിച്ചിരുന്നു. കോവിഡ് ബാധ കൂടി ആയതോടെ ഇവരുടെ ആരോഗ്യനില കൂടുതല് വഷളായി. വെന്റിലേറ്ററിലേക്ക് മാറ്റി ചികിത്സ നല്കിത്തുടങ്ങിയെങ്കിലും രക്ഷിക്കാനായില്ല.
