ന്യൂദല്ഹി-കോവിഡ് പ്രതിരോധ പ്രവര്ത്തനങ്ങള്ക്ക് പണം ശേഖരിക്കുന്നതിനായി ആരംഭിച്ച പി.എം. കെയേഴ്സ് ഫണ്ടിലേക്ക് പ്രതിമാസം 50,000 രൂപ വീതം സംഭാവന നല്കി തുടങ്ങിയതായി ചീഫ് ഓഫ് ഡിഫന്സ് സ്റ്റാഫ് ജനറല് ബിപിന് റാവത്ത് അറിയിച്ചു. ഒരുവര്ഷത്തേക്കാണ് ശമ്പളത്തില്നിന്ന് വലിയൊരു വിഹിതം നല്കുന്നത്.
തന്റെ ശമ്പളത്തില്നിന്ന് പി.എം. കെയേഴ്സ് ഫണ്ടിലേക്ക് മാസം 50,000 രൂപ പിടിക്കാന് ആവശ്യപ്പെട്ട് അധികൃതര്ക്ക് ബിപിന് റാവത്ത് നേരത്തെ കത്തെഴുതിയിരുന്നു. ഏപ്രില് മാസത്തെ ശമ്പളത്തില് നിന്ന് ആദ്യത്തെ ഗഡുവായ 50,000 രൂപ പി.എം.കെയേഴ്സ് ഫണ്ടിലേക്ക് പിടിച്ചതായി അദ്ദേഹം പറഞ്ഞു.
ഫണ്ട് രൂപീകരിച്ച സമയത്ത് തന്റെ ഒരുദിവസത്തെ ശമ്പളം സംഭാവന ചെയ്തിരുന്നു. ഇതിന് പുറമെയാണ് ഒരുവര്ഷത്തേക്ക് ഇത്രയും തുക നല്കാന് അദ്ദേഹം തീരുമാനിച്ചത്. നിലവില് എല്ലാമാസവും ഒരുദിവസത്തെ ശമ്പളം പി.എം.കെയേഴ്സ് ഫണ്ടിലേക്ക് നല്കാനുള്ള ഒപ്ഷന് പ്രതിരോധ മന്ത്രാലയത്തിലെ ജീവനക്കാര്ക്ക് നല്കിയിട്ടുണ്ട്. ഇത് നിര്ബന്ധമാക്കിയിട്ടില്ല. സൈന്യത്തിലെ മറ്റ് ഉയര്ന്ന ഉദ്യോഗസ്ഥരെ ഈ ഫണ്ടിലേക്ക് സംഭാവന ചെയ്യാന് പ്രേരിപ്പിക്കുക എന്ന ഉദ്ദേശത്തോടെയാണ് ബിപിന് റാവത്ത് ഇത്രവലിയ തുക സംഭാവന ചെയ്യാന് തീരുമാനിച്ചത്.
