കറാച്ചി- പാക്കിസ്ഥാനിലെ കറാച്ചിയിൽ വിമാനം തകർന്നുവീണ് മരിച്ചവരുടെ എണ്ണം 97 ആയി. കറാച്ചിയിലെ ജിന്ന എയർപോർട്ടിൽ ഇറങ്ങാനുള്ള ശ്രമത്തിനിടെയാണ് വിമാനം ജനവാസ കേന്ദ്രത്തിൽ തകർന്നുവീണത്. പാക്കിസ്ഥാൻ ഇന്റർനാഷണൽ എയർലൈൻസ് വിമാനമാണിത്. ലാഹോറിൽനിന്ന് കറാച്ചിയിലേക്ക് വന്ന പി.ഐ.എ എയർബസ് എ 320 ആണ് ജിന്ന ഇന്റർനാഷണൽ എയർപോർട്ടിനു സമീപം തകർന്നത്. 90 യാത്രക്കാരും എട്ട് ജോലിക്കാരുമാണ് വിമാനത്തിലുള്ളതെന്ന് പാക്കിസ്ഥാൻ സിവിൽ ഏവിയേഷൻ അതോറിറ്റി അറിയിച്ചു.
മരിച്ചവരിൽ 19 പേരെ ഇതോടകം തിരിച്ചറിഞ്ഞു. പ്രാദേശിക സമയം ഉച്ചക്ക് 2.30നാണ് വിമാനവുമായുള്ള ബന്ധം നഷ്ടപ്പെട്ടത്. പെരുന്നാളിന് കുടുംബത്തോടൊപ്പം ചേരാനാണ് ലാഹോറിൽനിന്ന് കറാച്ചിയിലേക്ക് നിരവധി പേർ ഈ വിമാനത്തിൽ എത്തിയത്.