തിരുവനന്തപുരം- കോവിഡ് പരത്തിയത് പ്രത്യേക മതവിഭാഗമാണെന്ന തരത്തില്‍ ഏപ്രില്‍ 15 ലെ പി.എസ്.സി ബുള്ളറ്റിനിലെ സമകാലികം പംക്തിയില്‍ ഉത്തരം പ്രസിദ്ധീകരിച്ചതിന് ഉത്തരവാദികളായവര്‍ക്കെതിരെ മത സ്പര്‍ദ്ധ വളര്‍ത്താന്‍ ശ്രമിച്ചതിനടക്കം വകുപ്പുകള്‍ ചുമത്തി കേസെടുക്കണമെന്ന് വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് ഹമീദ് വാണിയമ്പലം ആവശ്യപ്പെട്ടു.
ഇതുസംബന്ധിച്ച് പി.എസ്.സി ബുള്ളറ്റിന്‍ പത്രാധിപ സമിതി ചെയര്‍പേഴ്‌സണ്‍, പ്രിന്റര്‍ ആന്‍ഡ് പബ്ലിഷര്‍, പംക്തി കൈകാര്യം ചെയ്യുന്ന വ്യക്തികള്‍ എന്നിവര്‍ക്കെതിരെ പാര്‍ട്ടി സംസ്ഥാന ജനറല്‍ സെക്രട്ടറി കെ.എ ഷഫീഖ് മെഡിക്കല്‍ കോളേജ് പോലീസില്‍ പരാതി നല്‍കി. മുഖ്യമന്ത്രി, ഡി.ജി.പി എന്നിവര്‍ക്കും പരാതി നല്‍കിയിട്ടുണ്ട്.
ലക്ഷക്കണക്കിന് ഉദ്യോഗാര്‍ഥികള്‍ ആധികാരിക റഫറന്‍സായി കണക്കാക്കുന്ന പി.എസ്.സി ബുള്ളറ്റിന്‍ മതവിദ്വേഷം പ്രചരിപ്പിക്കാനുള്ള മാര്‍ഗമായി കണ്ടത് ഒരു നിലക്കും പൊറുക്കാവുന്നതല്ല. ബുള്ളറ്റിന്‍ പിന്‍വലിച്ചതുകൊണ്ട് പ്രശ്‌നം തീരുന്നില്ല. മതവിദ്വേഷ പ്രചരണം എന്ന ക്രിമിനല്‍ കുറ്റമാണ് നടന്നിരിക്കുന്നത്. ഇതാവര്‍ത്തിക്കാതിരിക്കാന്‍ ഉത്തരവാദികളെ നിയമപരമായി ശിക്ഷിക്കുക തന്നെ വേണം. കേരളത്തിലെ പോലീസ് സംവിധാനം ഇക്കാര്യത്തില്‍ കാര്യക്ഷമമായി പ്രവര്‍ത്തിക്കുന്നില്ലെങ്കില്‍ മറ്റു നിയമ നടപടികളും പാര്‍ട്ടി കൈക്കൊള്ളുമെന്ന് അദ്ദേഹം പറഞ്ഞു.
