തിരുവനന്തപുരം- സംസ്ഥാനത്ത് ഇന്ന് പുതിയ കോവിഡ്19 പോസിറ്റീവ് കേസുകള് ഇല്ലെന്ന് സര്ക്കാര് വാര്ത്താക്കുറിപ്പില് അറിയിച്ചു. ഒമ്പതുപേര് രോഗമുക്തി നേടി. കണ്ണൂര്, കാസര്കോട് ജില്ലയിലെ നാലുപേരുടെ വീതവും എറണാകുളം ജില്ലയില് നിന്നുള്ള ഒരാളുടെയും പരിശോധനാഫലമാണ് ഇന്ന് നെഗറ്റീവ് ആയത്. ഇതോടെ 392 പേരാണ് ഇതുവരെ കോവിഡില്നിന്നു മുക്തി നേടിയത്. 102 പേരാണ് നിലവില് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്. കോവിഡ് സ്ഥിതി ആശ്വാസകരമാണെന്ന് മുഖ്യമന്ത്രി പിണറായി വിജയന് ഫെയ്സ്ബുക്കില് കുറിച്ചു.
സംസ്ഥാനത്തെ വിവിധ ജില്ലകളിലായി 21,499 പേര് നിരീക്ഷണത്തിലാണ്. ഇവരില് 21,067 പേര് വീടുകളിലും 432 പേര് ആശുപത്രികളിലും നിരീക്ഷണത്തിലാണ്. 106 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. രോഗലക്ഷണങ്ങള് ഉള്ള 27,150 വ്യക്തികളുടെ സാമ്പിള് പരിശോധനക്ക് അയച്ചിട്ടുണ്ട്. ഇതില് ലഭ്യമായ 26,225 സാമ്പിളുകളുടെ പരിശോധനാഫലം നെഗറ്റിവ് ആണ്.
