കൊച്ചി- ലോക് ഡൗണ്‍ നിയന്ത്രണങ്ങള്‍ ലംഘിച്ച് വാര്‍ത്താസമ്മേളനം നടത്തിയതിന് ബിജെപി സംസ്ഥാന വൈസ് പ്രസിഡന്റ് എ.എന്‍ രാധാകൃഷ്ണന്‍ ഉള്‍പ്പെടെഅഞ്ച് പേര്‍ക്കെതിരെ പോലീസ് കേസെടുത്തു. ലോക്ക് ഡൗണ്‍ ലംഘനം, നിയമ വിരുദ്ധമായി സംഘം ചേരല്‍ എന്നീ വകുപ്പുകള്‍ പ്രകാരമാണ് രാധാകൃഷ്ണനെതിരെ ചേരാനെല്ലൂര്‍ പോലീസ് കേസെടുത്തത്.
കോവിഡ് പ്രതിരോധ പ്രവര്‍ത്തനങ്ങള്‍ ഊര്‍ജിതമായി നടക്കുന്നതിനിടെ 23ന് ചേരാനെല്ലൂരില്‍ രാധാകൃഷ്ണന്റെ വീടിന് സമീപത്ത് വച്ചായിരുന്നു വാര്‍ത്താസമ്മേളനം നടത്തിയത്. രാധാകൃഷ്ണനോട് ഒപ്പമുണ്ടായിരുന്ന നാല് പേരെ അന്നു തന്നെ അറസ്റ്റ് ചെയ്തു സ്റ്റേഷന്‍ ജാമ്യത്തില്‍ വിട്ടയച്ചു. രാധാകൃഷ്ണനോടു സ്റ്റേഷനില്‍ ഹാജരാകണമെന്നു പോലീസ് ആവശ്യപ്പെട്ടിട്ടുണ്ട്.
കൊവിഡ്-19 രോഗ പ്രതിരോധപ്രവര്‍ത്തനത്തിന്റെ ഭാഗമായി പ്രഖ്യാപിച്ചിരിക്കുന്ന ലോക്ക് ഡൗണ്‍ ലംഘനത്തിന് എറണാകുളത്ത് 255 പേരെക്കൂടി അറസ്റ്റു ചെയ്തു.129 വാഹനങ്ങള്‍ പിടിച്ചെടുത്തു.273 കേസുകള്‍ രജിസ്റ്റര്‍ ചെയ്തു.കൊച്ചി സിറ്റി പോലിസ് കമ്മീഷണറേറ്റ് പരിധിയില്‍ മാത്രമായി 128 കേസുകള്‍ ഇന്നലെ രജിസ്റ്റര്‍ ചെയ്തു.145 പേരെ അറസ്റ്റു ചെയ്തു. 66 വാഹനങ്ങള്‍ പിടിച്ചെടുത്തു.എറണാകുളം പെന്റാ മേനകയില്‍ കൊവിഡ് ബാധിതരായ രോഗികള്‍ പ്രവേശിച്ചുവെന്ന വ്യാജ വാര്‍ത്ത വാട്സ് ആപ്പിലൂടെ പ്രചരിപ്പിച്ച സംഭവത്തില്‍ എറണാകുളം സെന്‍ട്രല്‍ പോലിസ് കേസ് രജിസ്റ്റര്‍ ചെയ്തു. എറണാകുളം റൂറല്‍ ജില്ലയില്‍ 145 കേസുകള്‍ രജിസ്റ്റര്‍ ചെയ്തു. 110 പേരെ അറസ്റ്റ് ചെയ്തു. 63 വാഹനങ്ങള്‍ കണ്ടു കെട്ടി. മാസ്‌ക്ക് ധരിക്കാത്തതിന് 91 പേര്‍ക്കെതിരെ കേസെടുത്തു. നമ്പര്‍ ക്രമം തെറ്റിച്ച് നിരത്തിലിറങ്ങിയ ഒമ്പത് വാഹന ഉടമകള്‍ക്കെതിരെയും നടപടിയെടുത്തു. എറണാകുളം റൂറല്‍ ജില്ലയില്‍ മാത്രമായി ഇതുവരെ 8990 പേര്‍ക്കെതിരെ കേസെടുത്തതായി റൂറല്‍ ജില്ലാ പോലിസ് മേധാവി കെ കാര്‍ത്തിക് അറിയിച്ചു.8244 പേരെ അറസ്റ്റ് ചെയ്തു. 4902 വാഹനങ്ങള്‍ കണ്ടുകെട്ടി. ലോക് ഡൗണ്‍ ലംഘിക്കുന്നവര്‍ക്കെതിരെ ശക്തമായ നടപടി തുടര്‍ന്നും സ്വീകരിക്കുമെന്നും റൂറല്‍ ജില്ലാ പോലിസ് മേധാവി അറിയിച്ചു.
