ന്യൂദൽഹി- കോവിഡ് 19 വ്യാപന പശ്ചാത്തലത്തിൽ നിർത്തിവെച്ചിരിക്കുന്ന വിമാന സർവീസ് പുനഃരാരംഭിക്കാൻ തീരുമാനമായിട്ടില്ലെന്ന് കേന്ദ്ര വ്യോമയാന സഹമന്ത്രി ഹർദീപ് സിംഗ് പുരി.
കേന്ദ്രസർക്കാർ തീരുമാനം പ്രഖ്യാപിക്കുന്നതുവരെ വിമാനക്കന്പനികൾ ബുക്കിംഗ് ആരംഭിക്കരുതെന്നും അദ്ദേഹം പറഞ്ഞു.
ആഭ്യന്തര, രാജ്യാന്തര സർവീസുകൾ ആരംഭിക്കാൻ ഇതുവരെ തീരുമാനമെടുത്തിട്ടില്ല. ഇക്കാര്യത്തിൽ സർക്കാർ തീരുമാനം എടുത്തശേഷമേ വിമാനക്കന്പനികൾ ബുക്കിംഗ് തുടങ്ങാവു എന്നും ഹർദീപ് സിംഗ് പറഞ്ഞു. എയർ ഇന്ത്യ ബുക്കിംഗ് ആരംഭിച്ചതിനു പിന്നാലെയാണ് മന്ത്രിയുടെ പ്രതികരണം.
ലോക്ഡൗണ് അവസാനിക്കുന്നതോടെ സർവീസുകൾ ആരംഭിക്കാനായിരുന്നു എയർ ഇന്ത്യയുടെ തീരുമാനം. മേയ് നാല് മുതൽ ചില നഗരങ്ങളിലേക്കുള്ള ആഭ്യന്തര സർവീസുകൾ ആരംഭിക്കാനാണ് എയർ ഇന്ത്യ തീരുമാനിച്ചിരുന്നത്.
ആഭ്യന്തര സർവീസുകൾക്ക് പുറമേ രാജ്യാന്തര സർവീസുകളും ജൂണ് ഒന്നുമുതൽ പുനഃരാരംഭിക്കുമെന്നും എയർ ഇന്ത്യ വെബ് സൈറ്റില് വ്യക്തമാക്കിയിരുന്നു.