ന്യൂദല്ഹി- കോവിഡ് 19 മായി ബന്ധപ്പെട്ട ലോക് ഡൗണ് നീട്ടിയ സാഹചര്യത്തില് വാഹന, ആരോഗ്യ ഇന്ഷുറന്സ് പോളിസികള് പുതുക്കാനുള്ള തീയതി മെയ് 15 വരെ നീട്ടി. ലോക്ഡൗണ് കാലയളവില് പ്രീമിയം അടക്കാന് നേരിടുന്ന ബുദ്ധിമുട്ടുകള് കുറക്കാന് ലക്ഷ്യമിട്ടാണ് തീരുമാനം. ഇത് സംബന്ധിച്ച് കേന്ദ്രം വിജ്ഞാപനം പുറപ്പെടുവിച്ചു. തേര്ഡ് പാര്ട്ടി മോട്ടോര് വാഹന ഇന്ഷുറന്സിനും ആരോഗ്യ ഇന്ഷുറന്സ് പോളിസികള്ക്കുമാണ് നീട്ടിയ കാലയളവ് ബാധകമാകുക.
മാര്ച്ച് 25നും മെയ് മൂന്നിനുമിടയില് കാലാവധി തീരുന്ന ആരോഗ്യ, മോട്ടോര് വാഹന തേര്ഡ് പാര്ട്ടി പോളിസി ഉടമകള്ക്ക് കോവിഡ് മൂലമുള്ള പ്രതിസന്ധി കാരണം പ്രീമിയം സമയത്തിന് പുതുക്കാന് സാധിക്കുന്നില്ലെങ്കില്, മെയ് 15 നുള്ളില് പ്രീമിയം അടച്ചാല് മതി. ഈ കാലയളവില്, പുതുക്കേണ്ട സമയം കഴിഞ്ഞാലും പുതുക്കേണ്ട തീയതി മുതല് പോളിസി നിലനില്ക്കുകയും തടസമില്ലാതെ ക്ലെയിം ചെയ്യാനും സാധിക്കും .
