ബീജിംഗ്- ചൈനയുടെ വെയ്ബോ മൈക്രോബ്ലോഗില് വൈറലായ ഈ ചിത്രം ചൈനയില് പലരിലും ചിരി പടര്ത്തുന്നു. പ്രത്യേകമായി രൂപകല്പ്പന ചെയ്ത ഫെയ്സ് മാസ്ക് തൊപ്പി ഉപയോഗിച്ച് ഒരു സ്ത്രീ സ്ട്രോ ഉപയോഗിച്ച് ഐസ് ടീ കുടിക്കുന്ന ചിത്രമാണത്.
മാസ്ക് പ്രവര്ത്തിക്കുന്നുണ്ടോ ഇല്ലയോ എന്നത് ചര്ച്ചാവിഷയമാണ്, എന്നിരുന്നാലും ഇത് ചൈനീസ് നെറ്റിസന്മാരുടെ മുഖത്ത് പുഞ്ചിരി വിടര്ത്തുന്നു. ഏകദേശം രണ്ട് മാസത്തിന് ശേഷം ജീവിതം സാധാരണ അവസ്ഥയിലേക്ക് മടങ്ങിവരുന്നതിന്റെ സൂചനയായാണ് പലരും അതിനെ കാണുന്നത്.
11,000 ത്തിലധികം ഉപയോക്താക്കള് #MilkTeaMask എന്ന ഹാഷ്ടാഗ് ഉപയോഗിക്കുന്നു, ഒപ്പം മാസ്ക്കിന്റെ രൂപകല്പ്പന മികച്ചതാക്കുന്നതിനുള്ള മാര്ഗങ്ങളും അവര് ഉപദേശിക്കുന്നു. ഇത്തരമൊരു കണ്ടുപിടിത്തം നടത്തിയവരുടെ സാമൂഹിക പ്രതിബദ്ധതയെക്കുറിച്ച് അവര് വാചാലരാണ്. ചില ഓണ്ലൈന് നിര്മ്മാതാക്കള് ഇത് പകര്ത്താന്പോലും തിരക്കുകൂട്ടുന്നു.
ആളുകള്ക്ക് ഐസ്ഡ്, മില്ക് ടീ എന്നിവയോടുള്ള ഇഷ്ടം കൊറോണക്കാലത്തും കുറഞ്ഞില്ല എന്നും ഉത്തരവാദിത്തത്തോടെ കുടിക്കുന്നത് അവര് നിര്ത്തിയില്ല എന്നും ചൈനക്കാര് തമാശ പറയുന്നു. ഫെബ്രുവരി അവസാനത്തില്, മധ്യ നഗരമായ ചാങ്ഷയിലെ ഒരു ചായക്കട ഉടമ തിരക്കേറിയ തെരുവിലേക്ക് ഒരു മീറ്റര് നീളമുള്ള മാര്ക്കറുകള് സ്ഥാപിച്ചു. ആളുകള്ക്ക് സാമൂഹിക അകലം പാലിക്കാനും ചായ ആസ്വദിക്കാനും ഇപ്പോഴും കഴിയുമെന്നായിരുന്നു ഉടമയുടെ കമന്റ്.
