തിരുവനന്തപുരം- കൊറോണ വ്യാപനത്തിന്റെ പശ്ചാത്തലത്തില് സംസ്ഥാനത്ത് മാര്ച്ച് 31 വരെ ലോക്ഡൗണ് പ്രഖ്യാപിച്ചു. സംസ്ഥാന അതിര്ത്തികള് അടച്ചിടാനും തീരുമാനമായി. അസാധാരണ സാഹചര്യത്തിലേക്ക് നീങ്ങുന്ന സ്ഥിതിയിലാണ് കേരളത്തിലാകെ അടച്ചുപൂട്ടല് ഏര്പ്പെടുത്തുന്നതെന്ന് മുഖ്യമന്ത്രി പിണറായി വിജയന് വാര്ത്താ സമ്മേളനത്തില് അറിയിച്ചു. ആശുപത്രികളും പെട്രോള് പമ്പുകളും തുറന്നു പ്രവര്ത്തിക്കുമെന്നും അവശ്യസാധനങ്ങളുടെ ലഭ്യത ഉറപ്പാക്കുമെന്നും മുഖ്യമന്ത്രി ഉറപ്പു നല്കി.
അവശ്യ സാധനങ്ങള് വില്ക്കുന്ന കടകളും മെഡിക്കല് ഷോപ്പുകളും തുറക്കും.സര്ക്കാര് ഓഫീസുകള് സുരക്ഷാ സംവിധാനങ്ങള് ഉറപ്പാക്കി പ്രവര്ത്തിക്കും. ആരാധനാലയങ്ങളിലെ ആളുകള് കൂടുന്ന ചടങ്ങുകള് നിര്ത്തിവെക്കും. കെഎസ്ആര്ടിസിയോ സ്വകാര്യ ബോസോ ഓടില്ല. എന്നാല് സ്വകാര്യ വാഹനങ്ങള് അനുവദിക്കും. പെട്രോള് പമ്പ്, എല്പിജി വിതരണം എന്നിവ ഉണ്ടാകും. അവശ്യവസ്തുക്കള് വിതരണം ചെയ്യുന്ന കടകളൊഴികെ മറ്റ് കടകള് തുറന്ന് പ്രവര്ത്തിക്കാന് അനുവദിക്കില്ല. റെസ്റ്റോറ്ന്റുകള് തുറക്കാമെങ്കിലും അവിടെവച്ച് ഭക്ഷണം കഴിക്കാന് അനുവദിക്കില്ല. പായ്ക്ക് ചെയ്ത് താമസസ്ഥലത്ത് കൊണ്ടുപോയി കഴിക്കേണ്ടിവരും.
കൂടുതല് കൊറോണ കേസുകള് റിപ്പോര്ട്ട് ചെയ്ത കാസര്ഗോഡ് ജില്ലയില് അനാവശ്യമായി പുറത്തിറങ്ങുന്നവരെ അറസ്റ്റ് ചെയ്യുമെന്നും ഇവര്ക്ക് കനത്ത പിഴ ചുമത്തുമെന്നും മുഖ്യമന്ത്രി വ്യക്തമാക്കി. ജനങ്ങള് വലിയ തോതില് പുറത്തിറങ്ങാതിരിക്കാന് ശ്രദ്ധിക്കണം. അത്യാവശ്യത്തിന് ഇറങ്ങുന്നവര് ശാരീരിക അകലം അടക്കമുളളവ പാലിക്കണമെന്നും മുഖ്യമന്ത്രി വാര്ത്താ സമ്മേളനത്തില് പറഞ്ഞു
