ബീജിങ്- കൊറോണ വൈറസ് ബാധിച്ച് മരിക്കുന്നവരില്‍ സ്ത്രീകളേക്കാള്‍ കൂടുതല്‍ പുരുഷന്മാരാണെന്ന് റിപ്പോര്‍ട്ട്. ഇറ്റലിയിലെയും ചൈനയിലെയും കൊറോണ മരണങ്ങളുടെ വിശദാംശങ്ങളാണ് ഇക്കാര്യം വ്യക്തമാക്കുന്നത്. ഏത് പ്രായക്കാരിലും സ്ത്രീകളേക്കാള്‍ പുരുഷന്മാരാണ് വൈറസ് ബാധിച്ച് മരിക്കുന്നതെന്ന് ഇറ്റലിയിലെ വിവരങ്ങള്‍ വ്യക്തമാക്കുന്നുവെന്ന് വൈറ്റ്ഹൗസ് കോവിഡ് -19 ടാസ്‌ക് ഫോഴ്‌സ് ഡയറക്ടര്‍ ഡോ. ഡെബോറ ബിര്‍ക്‌സ് പറഞ്ഞു. അസുഖം ബാധിക്കുന്നവരില്‍ പുരുഷന്മാരും ആണ്‍കുട്ടികള്‍ക്കുമാണ് പെട്ടെന്ന് ഗുരുതരമാകുന്നത്. ഇറ്റാലിയന്‍ ഹെല്‍ത്ത് അതോറിറ്റിയുടെ കണക്കുകള്‍ പ്രകാരം, ഫെബ്രുവരി 21 നും മാര്‍ച്ച് 12നും ഇടയില്‍ 13882 കൊറോണ കേസുകളുണ്ടായി. അവയില്‍ 58% രോഗികളും പുരുഷന്മാരാണ് .കൂടാതെ അക്കാലയളവില്‍ സംഭവിച്ച 882 മരണങ്ങളില്‍ 72% പുരുഷന്മാരാണെന്നും റിപ്പോര്‍ട്ട് പറയുന്നു. ആശുപത്രിയില്‍ പ്രവേശിപ്പിക്കപ്പെട്ട രോഗികളില്‍ മരണം സംഭവിച്ചവരില്‍ 75% പുരുഷന്മാരാണ്.
ഇക്കാര്യം തന്നെയാണ് ചൈനയും ദക്ഷിണകൊറിയയും അടിവരയിട്ട് പറയുന്നത്.2019 ഡിസംബര്‍ മുതല്‍ 2020 ഫെബ്രുവരി വരെ ചൈനയില്‍ സമര്‍പ്പിച്ച എല്ലാ കോവിഡ് -19 പേഷ്യന്റ് പ്രൊഫൈല്‍ പഠനങ്ങളുടെയും വിശകലനം സൂചിപ്പിക്കുന്നത് രോഗബാധിതരും രോഗികളുമായവരില്‍ ഏകദേശം 60% പുരുഷന്മാരുണ്ട്. ഫെബ്രുവരി 11 ലെ റിപ്പോര്‍ട്ട് പരിശോധിച്ചാല്‍ ചൈനയിലെ 44,600 കേസുകളുടെ വിശദമായ കണക്കെടുപ്പില്‍, കൊറോണ വൈറസ് അണുബാധയുള്ള പുരുഷന്മാരില്‍ മരണനിരക്ക് സ്ത്രീകളേക്കാള്‍ 65% കൂടുതലാണെന്ന് ചൈനയിലെ സെന്റര്‍ ഫോര്‍ ഡിസീസ് കണ്‍ട്രോള്‍ റിപ്പോര്‍ട്ട് ചെയ്തു.16 വയസ്സിന് താഴെയുള്ള കുട്ടികളില്‍ പോലും കൊറോണ വൈറസ് പെണ്‍കുട്ടികളേക്കാള്‍ കൂടുതല്‍ ആണ്‍കുട്ടികളെ ബാധിച്ചേക്കാമെന്നാണ് വിലയിരുത്തല്‍. വുഹാന്‍ ചില്‍ഡ്രന്‍സ് ഹോസ്പിറ്റലില്‍ ചികിത്സ തേടിയ 171 കുട്ടികളെയും കൗമാരക്കാരെയും കുറിച്ചുള്ള സമീപകാല റിപ്പോര്‍ട്ടില്‍ 61% പുരുഷന്മാരാണ്.ദക്ഷിണ കൊറിയയിലും കാര്യങ്ങള്‍ വ്യത്യസ്തമല്ല.വൈറസ് സ്ഥിരീകരിച്ച രോഗികളില്‍ 62% പുരുഷന്മാരാണ്.
രോഗബാധിതരായ പുരുഷന്മാര്‍ സ്ത്രീകളേക്കാള്‍ 89% മരിക്കാനുള്ള സാധ്യത കൂടുതലാണെന്നും അധികൃതര്‍ പറയുന്നു.
കൊറോണ വൈറസ് ബാധയില്‍ പുരുഷന്മാര്‍ക്ക് വില്ലനാകുന്നത് ലിംഗ അസമത്വമാണെന്ന് ഒരു വാദമുണ്ട്.
സാമൂഹികവും സാംസ്‌കാരികവുമായ വേരുകളുമായുള്ള വ്യക്തമായ ലിംഗപരമായ അസമത്വം വഴി എളുപ്പത്തില്‍ വിശദീകരിക്കാനാകുമെന്ന് ആരോഗ്യവിദഗ്ധര്‍ പറയുന്നു. ലോകമെമ്പാടും പുരുഷന്മാര്‍ സിഗരറ്റ് വലിക്കാനുള്ള സാധ്യതയാണ് ഇതിനായി ചൂണ്ടിക്കാട്ടുന്നത്. അത് അവരുടെ ശ്വാസകോശത്തെ തകരാറിലാക്കുകയും ഒരു അണുബാധയുമായി പോരാടുമ്പോള്‍ വീക്കം സംഭവിക്കുകയും കൂടുതല്‍ നാശമുണ്ടാക്കുകയും ചെയ്യുന്നുവെന്നാണ് കണ്ടെത്തല്‍.ലോകത്തില്‍ തന്നെ മരണനിരക്ക് ഏറ്റവും ഉയര്‍ന്ന നിരക്കിലുള്ള ചൈനയില്‍, 2010 ലെ കണക്ക് അനുസരിച്ച് 54 %
പുരുഷന്മാരും പുകവലിക്കുന്നവരാണ്. 8.4% പേര്‍ മുമ്പ് പുകവലിച്ചിട്ടുണ്ട്. 2016 ലെ പഠനം അനുസരിച്ച് ചൈനീസ് സ്ത്രീകളില്‍ 3.4% മാത്രമേ പുകവലിയുള്ളൂ.ദക്ഷിണ കൊറിയയില്‍, അസമത്വം ഏതാണ്ട് വ്യക്തമാണ്. മുതിര്‍ന്ന പുരുഷന്മാരില്‍ പകുതിയും 4% സ്ത്രീകളും പുകവലിക്കുന്നു. ഇറ്റലിയില്‍ പ്രായപൂര്‍ത്തിയായ പുരുഷന്മാരില്‍ 28% 20% സ്ത്രീകളും പുകവലിക്കുന്നു. ഇതൊക്കെയാണ് ലിംഗ അസമത്വം കൊറോണ മരണങ്ങള്‍ക്ക് കാരണമാകുന്നുവെന്ന വിലയിരുത്തലിന് അടിത്തറയാകുന്നത്. എന്നിരുന്നാലും മറ്റൊരു കണ്ടെത്തലും ഈ സാഹചര്യത്തില്‍ ശ്രദ്ധ അര്‍ഹിക്കുന്നു. സ്ത്രീകളുടെ ശരീര പ്രകൃതമാണ് രോഗബാധ കുറയാനുള്ള കാരണമെന്നാണ് അഭിപ്രായം.
2016ലും 2017ലും എലികളില്‍ നടത്തിയ പരീക്ഷണത്തില്‍ കൊറോണ വൈറസുകള്‍ പെണ്‍ എലിയേക്കാള്‍ ബാധിക്കുന്നത് ആണ്‍ എലികളെയാണെന്ന് കണ്ടെത്തിയിരുന്നു. ഏത് പ്രായത്തിലുള്ള ആണ്‍ എലിയും പെണ്‍ എലിയേക്കാള്‍ വേഗത്തില്‍ വൈറസ് ബാധിക്കുകയും മരിക്കുകയും ചെയ്യുന്നുവെന്നാണ് പേള്‍മാന്‍ നേതൃത്വം നല്‍കിയ ഗവേഷണസംഘം കണ്ടെത്തിയത്. അതേസമയം അണ്ഡാശയത്തെ നീക്കം ചെയ്യുമ്പോഴോ ഈസ്ട്രജന്‍ ഹോര്‍മോണിന്റെ പ്രവര്‍ത്തനത്തെ നിയന്ത്രിക്കാന്‍ മരുന്നുകള്‍ നല്‍കുമ്പോഴോ പെണ്‍ എലികളില്‍ മരണനിരക്ക് വര്‍ധിക്കുന്നുവെന്നും പഠനം പറയുന്നു. പേള്‍മാന്റെ നിരീക്ഷണം അനുസരിച്ച് കൊറോണ വൈറസുകളെ നശിപ്പിക്കാന്‍ സാധിക്കുന്ന എന്തോ ഒന്ന് ഈസ്ട്രജനിലുണ്ട്.പുതിയ സാര്‍സ് -കോവിഡ് -19 വൈറസിനും ഇത് ശരിയായി വരുമെന്നാണ് അദ്ദേഹം കരുതുന്നത്. ഈസ്ട്രജന്‍ ഹോര്‍മോണിന്റെ ശക്തമായ സാന്നിധ്യം സ്ത്രീകളെ സംരക്ഷിക്കുന്നതില്‍ പങ്കുവഹിക്കുന്നുവെന്ന് അദ്ദേഹം പറയുന്നു. വര്‍ഷങ്ങളായി രോഗപ്രതിരോധ ശാസ്ത്രജ്ഞര്‍ പുരുഷ സസ്തനികളെ മാത്രമേ പഠിച്ചിട്ടുള്ളൂ.കാരണം സ്ത്രീ ഹോര്‍മോണുകളുടെ സങ്കീര്‍ണത അവരുടെ കണ്ടെത്തലുകളെ കുഴപ്പത്തിലാക്കുകയാണെന്നും ശാസ്ത്രജ്ഞര്‍ അഭിപ്രായപ്പെടുന്നു.
