അഹമ്മദാബാദ്- യു.എസ്. പ്രസിഡന്റ് ഡോണള്ഡ് ട്രംപ് ഇന്ത്യയിലെത്തി. 11.40-ന് ഗുജറാത്തിലെ അഹമ്മദാബാദിലെ സര്ദാര് വല്ലഭായ് പട്ടേല് അന്താരാഷ്ട്ര വിമാനത്താവളത്തിലെത്തിയ ട്രംപിനെ പ്രധാനമന്ത്രി നരേന്ദ്ര മോഡി വരവേറ്റു. ഭാര്യ മെലാനിയയും ഉന്നതതല പ്രതിനിധി സംഘവും ട്രംപിനെ അനുഗമിക്കുന്നുണ്ട്.
12.15-ന് സബര്മതി ആശ്രമസന്ദര്ശനം. തുടര്ന്ന് മൊട്ടേര ക്രിക്കറ്റ് സ്റ്റേഡിയത്തില് നടക്കുന്ന നമസ്തേ ട്രംപ് പരിപാടിയില് ട്രംപും മോഡിയും പങ്കെടുക്കും. ട്രംപിനെ സ്വീകരിക്കാനായി വിമാനത്താവളം മുതല് സ്റ്റേഡിയം വരെ ഇരുവശങ്ങളിലും ഇന്ത്യയുടെ സംസ്കാരം വിളിച്ചോതുന്ന കലാപ്രകടനങ്ങളും ഒരുക്കിയിട്ടുണ്ട്. പ്രധാനമന്ത്രി നല്കുന്ന ഉച്ചവിരുന്നില് പങ്കെടുത്ത ശേഷം ട്രംപ് ആഗ്രയിലേക്കു പോകും. വൈകീട്ട് 4.45-ന് ആഗ്രയിലെത്തുന്ന ട്രംപും സംഘവും താജ്മഹല് സന്ദര്ശിക്കും. വൈകീട്ട് ദല്ഹിയിലെത്തും.