ബീജിംഗ്- പുതിയ കൊറോണ വൈറസ് കൊവിഡ്-19 ബാധിച്ച് ചൈനയിൽ മരിച്ചവരുടെ എണ്ണം 1868 ആയി. കഴിഞ്ഞ 24 മണിക്കൂറിനുള്ളിൽ 98 പേരാണ് മരിച്ചത്. ചൈനീസ് ദേശീയ ആരോഗ്യ കമ്മിറ്റിയാണ് ഇക്കാര്യം അറിയിച്ചത്. വൈറസ് ബാധ സ്ഥിരീകരിച്ചവരുടെ എണ്ണം 72436 ആയി ഉയർന്നു. 12552 അസുഖ ബാധിതരെ രോഗം ഭേദമായതിനെ തുടർന്ന് ആശുപത്രികളിൽ നിന്ന് ഡിസ്ചാർജ് ചെയ്തിട്ടുണ്ട്.രോഗം ബാധിച്ചവരില് 80 ശതമാനത്തിനും ഇപ്പോള് നേരിയ അസുഖം മാത്രമേയുള്ളൂവെന്നും ഈ മാസം ആദ്യം മുതല് രോഗം ബാധിക്കുന്നവരുടെ എണ്ണം കുറഞ്ഞുവരികയാണെന്നും ചൈനീസ് സെന്റർ ഫോർ ഡിസീസ് കണ്ട്രോള് ആന്റ് പ്രിവന്ഷന് അറിയിച്ചു.
ലോകാരോഗ്യ സംഘടന കൊവിഡ്-19 എന്ന് പേരിട്ട കൊറോണ വൈറസ് ബാധ മൂലമുള്ള രോഗം 2019 ഡിസംബറിൽ ചൈനയിലെ ഹുബെയ് പ്രവിശ്യയിലുള്ള വുഹാനിലാണ് ആദ്യം റിപ്പോർട്ട് ചെയ്തത്. പിന്നീട് ഇത് ഇന്ത്യയടക്കം 20ലേറെ രാജ്യങ്ങളിലേക്ക് പടർന്നു.