കോഴിക്കോട്- പൗരത്വ ഭേദഗതി നിയമത്തിനെതിരെ കോഴിക്കോട് കടപ്പുറത്ത് യൂത്ത് ലീഗ് നടത്തുന്ന ഷാഹീന്‍ ബാഗ് മോഡല്‍ സമരത്തിനെതിരെ ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍.
കടപ്പുറത്ത് ഷാഹീന്‍ബാഗ് സമരം നടത്തുന്നവര്‍ തീവ്രവാദികളാണെന്നും അവര്‍ക്ക് അതിന് അനുമതിയില്ലെന്നും സുരേന്ദ്രന്‍ പറഞ്ഞു. കടപ്പുറത്ത് പന്തല്‍ കെട്ടാനോ സമരം ചെയ്യാനോ കോര്‍പറേഷന്റെ അനുമതിയില്ലെന്നും അവിടെ നടക്കുന്നതെന്താണെന്ന് പോലീസും കോര്‍പറേഷനും അന്വേഷിക്കണമെന്നും സുരേന്ദ്രന്‍ ആവശ്യപ്പെട്ടു.
ഷാഹീന്‍ബാഗ് സ്‌ക്വയര്‍ എന്നൊക്കെ പറഞ്ഞ് കടപ്പുറത്ത് വിഷലിപ്തമായ മുദ്രാവാക്യം വിളികളാണ്. അന്വേഷിച്ചപ്പോള്‍ അതിന് അനുമതി ഇല്ലെന്നാണ് അറിഞ്ഞത്. കടപ്പുറത്ത് അനുമതിയില്ലാതെ സ്തൂപങ്ങള്‍ കെട്ടിയും സ്മാരകങ്ങള്‍ കെട്ടിയും തീവ്രവാദികള്‍ അഴിഞ്ഞാടുകയാണെന്ന് സുരേന്ദ്രന്‍ ആരോപിച്ചു.
നാടിനെ വിഘടിപ്പിക്കാനും നാട്ടില്‍ വര്‍ഗീയതയും തീവ്രവാദവും വളര്‍ത്താനും ഹിന്ദുക്കളെയും മുസ്‌ലിംകളെയും തമ്മിലടിപ്പിക്കാനുമായി ഗുരുതരമായ ക്രിമിനല്‍ കുറ്റം ചെയ്യുന്ന രാജ്യദ്രോഹികളെ മുഖ്യമന്ത്രി എന്തുകൊണ്ട് നിലക്ക് നിര്‍ത്തുന്നില്ലെന്നും സുരേന്ദ്രന്‍ ചോദിച്ചു.
