ന്യൂദല്ഹി-ജപ്പാനിലെ യോക്കോഹോമ തീരത്ത് പിടിച്ചിട്ടിരിക്കുന്ന ഡയമണ്ട് പ്രിന്സസ് ആഢംബര കപ്പലിലെ 61 പേര്ക്ക് കൊറോണ ബാധയെന്ന് സൂചന. 273 പേരുടെ രക്തസാമ്പിളുകള് പരിശോധിച്ചതില് 61 പേരില് കൊറോണ ബാധ സ്ഥിരീകരിച്ചുതായി പറയുന്നു.
കപ്പലിലെ 3700 യാത്രക്കാരില് ആറുപേര് ഇന്ത്യക്കാരാണെന്ന് ടൈംസ് ഓഫ് ഇന്ത്യ റിപ്പോര്ട്ടുചെയ്തു. വൈറസ് ബാധ സ്ഥിരീകരിച്ചവരില് ഇന്ത്യക്കാര് ആരുമില്ല. സ്ഥിതിഗതികള് നിരീക്ഷിച്ചു വരികയാണെന്ന് വിദേശകാര്യമന്ത്രി എസ്. ജയ്ശങ്കര് വ്യക്തമാക്കി.
കപ്പലിലെ പത്ത് യാത്രക്കാര്ക്ക് നേരത്തെ കൊറോണ സ്ഥിരീകരിച്ചിരുന്നു. ഇതോടെ കപ്പലിലെ നാലായിരത്തോളം സഞ്ചാരികളേയും ജീവനക്കാരേയും ക്വാറന്റൈന് ചെയ്തു. ആരെയും തീരത്തിറങ്ങാന് അനുവദിച്ചിരുന്നില്ല. ഹോങ്കോങ് തുറമുഖത്ത് കപ്പലിറങ്ങിയ യാത്രക്കാരന് കൊറോണ സ്ഥിരീകരിച്ചതിനെ തുടര്ന്നാണ് കപ്പലിലുള്ള 273 പേരുടെ സാംപിളുകള് പരിശോധിച്ചത്.
