ന്യൂദല്ഹി-ഇന്ത്യയിലെ പ്രമുഖ ആണവ ശാസ്ത്രജ്ഞരുടെയും ഐഎസ്ആര്ഒയുടെയും ഇ-മെയില് ചോര്ത്തിയതായി വിവരം. വിവരങ്ങള് ചോര്ന്ന മൂവായിരത്തോളം സര്ക്കാര് ഇ- മെയില് ഐഡികളിലാണ് ഐഎസ്ആര്ഒയുടെയും ആണവശാസ്ത്രജ്ഞരുടെയും ഇ-മെയില് ഐഡികള് ഉള്പ്പെട്ടിട്ടുള്ളതായി റിപ്പോര്ട്ടുള്ളത്. ക്വിന്റ് ആണ് ഇത് സംബന്ധിച്ച വാര്ത്ത പുറത്തുവിട്ടത്. ഐ.എസ്.ആര്.ഒ, ബാബാ ആറ്റോമിക് റിസേര്ച്ച് സെന്റര്, വിദേശകാര്യ മന്ത്രാലയം, ആറ്റോമിക് എനര്ജി റെഗുലേഷന് ബോര്ഡ്, സെബി എന്നീ വകുപ്പുകളുടെയും സ്ഥാപനങ്ങളുടെയും ഇമെയില് ഐഡികളാണ് ചോര്ന്നത്. അംബാസിഡര്മാരുടെയും ശാസ്ത്രജ്ഞരുടെയും നയതന്ത്ര ഉദ്യോഗസ്ഥരുടെയും വിരമിച്ചവരുടെയും ഇ-മെയിലുകളും ചോര്ത്തിയെന്നാണ് റിപ്പോര്ട്ടില് പറയുന്നത്. വിവരങ്ങള് ചോര്ത്തിയത് ഇന്ത്യയ്ക്ക് പുറത്ത് നിന്നുള്ളവരാണോ അകത്തുള്ളവരാണോ എന്ന കാര്യത്തില് വ്യക്തമായി വിവരം പുറത്തെത്തിയിട്ടില്ല. രഹസ്യാന്വേഷണ വിഭാഗം അന്വേഷണം ഊര്ജിതമാക്കിയിട്ടുണ്ട്
