കൊച്ചി- ശബരിമല ദര്‍ശനത്തിനായി കേരളത്തിലെത്തിയ തൃപ്തി ദേശായിക്കൊപ്പം കൊച്ചി കമീഷണര്‍ ഓഫീസിലെത്തിയ ബിന്ദു അമ്മിണിക്ക് നേരെ മുളക് സ്‌പ്രേ. കമീഷണര്‍ ഓഫീസിന് മുന്നില്‍ പ്രതിഷേധവുമായെത്തിയവരില്‍ ഉള്‍പെട്ട ഹിന്ദു ഹെല്‍പ് ലൈന്‍ പ്രവര്‍ത്തകനാണ് ബിന്ദുവിന് നേരെ മുളകുസ്‌പ്രേ പ്രയോഗിച്ചത്.
കാറില്‍ നിന്നു ഫയല്‍ എടുക്കാനായി ബിന്ദു കമ്മിഷണര്‍ ഓഫീസില്‍നിന്നു പുറത്തിറങ്ങിയപ്പോഴായിരുന്നു സംഭവം. നടന്നുവരുന്നതിനിടെ ഹിന്ദു ഹെല്‍പ് ലൈന്‍ നേതാവ് ശ്രീനാഥാണ് ബിന്ദുവിന് നേരെ മുളക് സ്‌പ്രേ പ്രയോഗിച്ചത്. തുടര്‍ന്ന് ബിന്ദു അമ്മിണിയെ ജനറല്‍ ആശുപത്രിയിലേക്കു മാറ്റി. ശ്രീനാഥിനെ പോലീസ് അറസ്റ്റ് ചെയ്തു.
ശബരിമല ദര്‍ശനത്തിനായി പുലര്‍ച്ചെയോടെയാണ് തൃപ്തി ദേശായിയും സംഘവും നെടുമ്പാശേരി വിമാനത്താവളത്തിലെത്തിയത്. ബിന്ദു അമ്മിണിയും ഇവരോടൊപ്പമുണ്ടായിരുന്നു. തൃപ്തിയും സംഘവും കമീഷണര്‍ ഓഫീസിലാണുള്ളത്. ദര്‍ശനത്തിന് സംരക്ഷണമൊരുക്കണമെന്ന് ആവശ്യപ്പെട്ടാണ് ഇവര്‍ പോലീസിനെ സമീപിച്ചത്.
