റിയാദ് - സൗദി അറേബ്യയിൽ ജോലി ചെയ്യുന്ന വിദേശികൾ ഓഗസ്റ്റിൽ സ്വദേശങ്ങളിലേക്ക് അയച്ചത് 992 കോടി റിയാലാണെന്ന് സൗദി അറേബ്യൻ മോണിട്ടറി അതോറിറ്റി വ്യക്തമാക്കുന്നു. കഴിഞ്ഞ വർഷം ഓഗസ്റ്റിനെ അപേക്ഷിച്ച് 4.8 ശതമാനം കുറവ് രേഖപ്പെടുത്തി. 2018 ഓഗസ്റ്റിൽ വിദേശികളുടെ റെമിറ്റൻസ് 1042 കോടി റിയാലായിരുന്നു. ഇക്കഴിഞ്ഞ ഓഗസ്റ്റിൽ വിദേശികൾ അയച്ച പണത്തിൽ 50 കോടി റിയാലിന്റെ കുറവുണ്ടായി.
കഴിഞ്ഞ ജൂലൈയെ അപേക്ഷിച്ച് ഓഗസ്റ്റിൽ വിദേശികളുടെ റെമിറ്റൻസിൽ 13.4 ശതമാനം കുറവ് രേഖപ്പെടുത്തി. ജൂലൈയിൽ 1146 കോടി റിയാൽ വിദേശികൾ ബാങ്കുകളും മണി എക്‌സ്‌ചേഞ്ചുകളും വഴി സ്വദേശങ്ങളിലേക്ക് അയച്ചിരുന്നു. ജൂലൈയെ അപേക്ഷിച്ച് ഓഗസ്റ്റിൽ വിദേശികളുടെ റെമിറ്റൻസിൽ 154 കോടി റിയാലിന്റെ കുറവുണ്ടായി. ഈ വർഷം ആദ്യത്തെ എട്ടു മാസത്തിനിടെ വിദേശികളുടെ റെമിറ്റൻസ് 8270 കോടിയായി കുറഞ്ഞിട്ടുണ്ട്. കഴിഞ്ഞ വർഷം ജനുവരി ഒന്നു മുതൽ ഓഗസ്റ്റ് 31 വരെയുള്ള എട്ടു മാസക്കാലത്ത് വിദേശികളുടെ റെമിറ്റൻസ് 9266 കോടി റിയാലായിരുന്നു. ഈ വർഷം ആദ്യത്തെ എട്ടു മാസത്തിനിടെ റെമിറ്റൻസിൽ 11.7 ശതമാനം കുറവ് രേഖപ്പെടുത്തി. റെമിറ്റൻസിൽ 1090 കോടി റിയാലിന്റെ കുറവാണുണ്ടായത്.
കഴിഞ്ഞ വർഷവും വിദേശികളുടെ റെമിറ്റൻസ് കുറഞ്ഞിരുന്നു. 2018 ൽ സൗദിയിൽ ജോലി ചെയ്യുന്ന വിദേശികൾ ആകെ 13,640 കോടി റിയാലാണ് ബാങ്കുകൾ വഴി അയച്ചത്. ആറു വർഷത്തിനിടെ വിദേശികളുടെ റെമിറ്റൻസ് ഇത്രയും കുറയുന്നത് ആദ്യമാണ്. 2016 മുതൽ വിദേശികളുടെ റെമിറ്റൻസ് തുടർച്ചയായി കുറഞ്ഞു വരികയാണ്.
വ്യക്തിപരമായ ആവശ്യങ്ങൾക്ക് ഓഗസ്റ്റിൽ സൗദികൾ വിദേശങ്ങളിലേക്ക് അയച്ച പണത്തിൽ 5.7 ശതമാനം വർധന രേഖപ്പെടുത്തി. ഓഗസ്റ്റിൽ 390 കോടി റിയാലാണ് സൗദികൾ വിദേശങ്ങളിലേക്ക് അയച്ചത്. 2018 ഓഗസ്റ്റിൽ ഇത് 360 കോടി റിയാലായിരുന്നു. എന്നാൽ ഈ വർഷം ജൂലൈ മാസത്തെ അപേക്ഷിച്ച് ഓഗസ്റ്റിൽ സൗദികൾ അയച്ച പണത്തിൽ 28 ശതമാനം കുറവ് രേഖപ്പെടുത്തി. ജൂലൈയിൽ സൗദികൾ 520 കോടി റിയാലാണ് വ്യക്തിപരമായ ആവശ്യങ്ങൾക്ക് വിദേശങ്ങളിലേക്ക് അയച്ചത്. ഈ വർഷം ആദ്യത്തെ എട്ടു മാസത്തിനിടെ സൗദികളുടെ റെമിറ്റൻസിൽ 9.1 ശതമാനം കുറവ് രേഖപ്പെടുത്തി. എട്ടു മാസത്തിനിടെ 3746 കോടി റിയാലാണ് സൗദികൾ വിദേശങ്ങളിലേക്ക് അയച്ചത്. കഴിഞ്ഞ വർഷം ആദ്യത്തെ എട്ടു മാസത്തിനിടെ സൗദികളുടെ റെമിറ്റൻസ് 4120 കോടി റിയാലായിരുന്നു. ഈ വർഷം ആദ്യത്തെ എട്ടു മാസത്തിനിടെ വിദേശങ്ങളിലേക്ക് സൗദികൾ അയച്ച പണത്തിൽ 375 കോടിയോളം റിയാലിന്റെ കുറവ് രേഖപ്പെടുത്തി.
