വാഷിങ്ടണ്‍- ഇന്ത്യയുടെ സമീപകാല സാമ്പത്തിക വളര്‍ച്ച പ്രതീക്ഷിച്ചതിലും ദുര്‍ബലമാണെന്ന് രാജ്യാന്തര നാണ്യ നിധി (ഐ.എം.എഫ്). ഏപ്രില്‍-ജൂണ്‍ പാദത്തില്‍ സാമ്പത്തിക വളര്‍ച്ച ഇടിഞ്ഞ് അഞ്ചു ശതമാനത്തിലെത്തിയതായി കേന്ദ്ര സര്‍ക്കാര്‍ പുറത്തുവിട്ട കണക്കുകള്‍ വ്യക്തമാക്കിയിരുന്നു. മുന്‍വര്‍ഷം ഇതേ പാദത്തില്‍ എട്ടു ശതമാനമായിരുന്നു വളര്‍ച്ച. പുതിയ കണക്കുകള്‍ വരാനിരിക്കുകയാണെങ്കിലും ഇന്ത്യയുടെ സമീപകാല സാമ്പത്തിക വളര്‍ച്ച പ്രതീക്ഷിച്ചതിലും വളരെ ദുര്‍ബലമാണെന്ന് ഐഎംഎഫ് വക്താവ് ജെറി റൈസ് പറഞ്ഞു. കോര്‍പറേറ്റ് രംഗത്തും പാരിസ്ഥിതിക നിയന്ത്രണങ്ങളിലുമുള്ള അനിശ്ചിതത്വം, ചില ബാങ്കിങ് ഇതര ധനകാര്യ കമ്പനികളുടെ മോശം അവസ്ഥ, അവലോകനത്തിലെ അപകടങ്ങള്‍ എന്നിവയാണ് ഇതിനു കാരണമായി ഐഎംഎഫ് ചൂണ്ടിക്കാട്ടുന്നത്.
2019-20 വര്‍ഷത്തില്‍ ഇന്ത്യയുടെ സാമ്പത്തിക വളര്‍ച്ചാ പ്രവചനം ഐഎംഎഫ് 0.3 ശതമാനം പോയിന്റുകള്‍ വെട്ടിക്കുറച്ച് എഴു ശതമാനമാക്കിയിട്ടുണ്ട്. ഉല്‍പ്പാദന മേഖലയിലും കാര്‍ഷിക ഉല്‍പ്പാദനത്തിലുമുണ്ടായ കുത്തനെയുള്ള ഇടിവാണ് മാന്ദ്യത്തിനു പ്രധാന കാരണമായി സ്റ്റാറ്റിസ്റ്റിക്‌സ് ആന്റ് പ്രോഗ്രാം ഇംപ്ലിമെന്റേഷന്‍ മന്ത്രാലയം ചൂണ്ടിക്കാട്ടുന്നത്.
