തബൂക്ക് - ആറു മാസത്തിനിടെ തബൂക്ക് വാണിജ്യ, നിക്ഷേപ മന്ത്രാലയ ശാഖ നടത്തിയ പരിശോധനകളിൽ കണ്ടെത്തിയത് 21 ബിനാമി ബിസിനസ് സ്ഥാപനങ്ങൾ. വാണിജ്യ വഞ്ചനകൾ നടത്തിയ 24 സ്ഥാപനങ്ങളും ഈ വർഷം ആദ്യ പകുതിയിൽ തബൂക്ക് വാണിജ്യ, നിക്ഷേപ മന്ത്രാലയ ശാഖ കണ്ടെത്തി.
ബിനാമി സ്ഥാപനങ്ങൾക്കും വാണിജ്യ വഞ്ചനകൾ നടത്തിയ സ്ഥാപനങ്ങൾക്കുമെതിരായ കേസുകൾ നിയമ നടപടികൾക്ക് പബ്ലിക് പ്രോസിക്യൂഷന് വാണിജ്യ, നിക്ഷേപ മന്ത്രാലയം കൈമാറി.
ഈ വർഷം ആദ്യത്തെ ആറു മാസത്തിനിടെ 4620 കൊമേഴ്‌സ്യൽ രജിസ്‌ട്രേഷനുകൾ തബൂക്ക് വാണിജ്യ, നിക്ഷേപ മന്ത്രാലയ ശാഖ അനുവദിച്ചു. ഇതിൽ 840 കൊമേഴ്‌സ്യൽ രജിസ്‌ട്രേഷനുകൾ പുതുക്കി നൽകുകയാണ് ചെയ്തത്. അവശേഷിക്കുന്നവ പുതിയ കൊമേഴ്‌സ്യൽ രജിസ്‌ട്രേഷനുകളാണ്. കോൺട്രാക്ടിംഗ് മേഖലയിൽ 672 സ്ഥാപനങ്ങൾക്കും റസ്റ്റോറന്റ് മേഖലയിൽ 240 സ്ഥാപനങ്ങൾക്കും ആറു മാസത്തിനിടെ പുതിയ കൊമേഴ്‌സ്യൽ രജിസ്‌ട്രേഷനുകൾ അനുവദിച്ചു. തബൂക്ക്, ദിബാ, അൽവജ് എന്നിവിടങ്ങളിൽ നിന്ന് ഉപയോക്താക്കളിൽനിന്ന് 3253 പരാതികളും ആറു മാസത്തിനിടെ മന്ത്രാലയ ശാഖക്ക് ലഭിച്ചു. ഗാരണ്ടി വ്യവസ്ഥകൾ പാലിക്കാതിരിക്കൽ, വിൽപനക്ക് പ്രദർശിപ്പിച്ച സ്റ്റാന്റിൽ രേഖപ്പെടുത്തിയ വിലയും കൗണ്ടറിൽ ഈടാക്കുന്ന വിലയും തമ്മിൽ വ്യത്യാസം, കരാർ വ്യവസ്ഥകൾ പാലിക്കാതിരിക്കൽ എന്നിവ അടക്കമുള്ള പരാതികളാണ് ഉപയോക്താക്കളിൽ നിന്ന് ലഭിച്ചത്.
ബലി പെരുന്നാൾ അവധിക്കാലത്ത് വ്യാപാര സ്ഥാപനങ്ങളിൽ പരിശോധനകൾ നടത്തുന്നതിന് 13 സംഘങ്ങളെ തബൂക്ക് വാണിജ്യ, നിക്ഷേപ മന്ത്രാലയ ശാഖ ചുമതലപ്പെടുത്തിയിരുന്നു. ബലി പെരുന്നാൾ അവധിക്കാലത്ത് 554 സ്ഥാപനങ്ങളിൽ ഈ സംഘങ്ങൾ പരിശോധനകൾ നടത്തി. ഉപയോക്താക്കളിൽ നിന്ന് ലഭിച്ച 199 പരാതികളിലും തബൂക്ക് വാണിജ്യ, നിക്ഷേപ മന്ത്രാലയ ശാഖക്കു കീഴിലെ സംഘങ്ങൾ അന്വേഷണങ്ങൾ നടത്തി നടപടികൾ സ്വീകരിച്ചു. തൊഴിൽ നിയമ ലംഘനങ്ങൾക്ക് പതിനെട്ടു സ്ഥാപനങ്ങൾക്ക് പിഴ ചുമത്തി.
ഈ വർഷം ആദ്യ പകുതിയിൽ തബൂക്കിൽ സ്വകാര്യ സ്ഥാപനങ്ങളിലും വ്യാപാര സ്ഥാപനങ്ങളിലും 6041 ഫീൽഡ് സന്ദർശനങ്ങളും അൽവജിൽ 143 ഫീൽഡ് സന്ദർശനങ്ങളും ദിബായിൽ 76 ഫീൽഡ് സന്ദർശനങ്ങളും തബൂക്ക് വാണിജ്യ, നിക്ഷേപ മന്ത്രാലയ ഉദ്യോഗസ്ഥർ നടത്തി. ഇതിനിടെ നിയമ ലംഘനങ്ങൾക്ക് 354 സ്ഥാപനങ്ങൾക്ക് തത്സമയം പിഴ ചുമത്തി. തബൂക്ക് വാണിജ്യ, നിക്ഷേപ മന്ത്രാലയ ശാഖയിൽ നിന്നുള്ള സേവനങ്ങളിൽ 79 ശതമാനം ഉപയോക്താക്കളും സംതൃപ്തി രേഖപ്പെടുത്തി. കഴിഞ്ഞ വർഷത്തെ അപേക്ഷിച്ച് മന്ത്രാലയ ശാഖയുടെ സേവനങ്ങളിൽ ഉപയോക്താക്കൾക്കുള്ള സംതൃപ്തി ശ്രദ്ധേയമായ തോതിൽ വർധിച്ചതായും തബൂക്ക് വാണിജ്യ, നിക്ഷേപ മന്ത്രാലയ ശാഖ റിപ്പോർട്ടിൽ പറഞ്ഞു.
