തിരുവനന്തപുരം- ഭീകരാക്രമണ പദ്ധതി ആസൂത്രണം ചെയ്തു ഭീകരർ കടൽ കടന്നെത്തിയെന്ന ഇന്റലിജൻസ് റിപ്പോർട്ടിനെ തുടർന്നു തമിഴ്നാടിന് പുറമെ കേരളത്തിലും ജാഗ്രതാ നിർദേശം. ശ്രീലങ്ക വഴി കടല് മാര്ഗം ലഷ്കര് ഇ ത്വയിബ ഭീകരര് തമിഴ്നാട്ടിലെത്തിയെന്ന റിപ്പോർട്ടാണ് ഇന്റലിജൻസ് വിഭാഗം കൈമാറിയത്. ശ്രീലങ്ക വഴി ആറ് ലഷ്കര് പ്രവര്ത്തകര് ഇന്ത്യയിലേക്ക് കടന്നതായി ഇന്റലിജന്സ് റിപ്പോര്ട്ടുണ്ടായിരുന്നു. അഞ്ച് ശ്രിലങ്കന് തമിഴ് വംശജരും ഒരു പാകിസ്ഥാന് സ്വദേശിയുമുള്പ്പെടുന്ന സംഘം തമിഴ്നാട്ടിലെ കോയമ്പത്തൂരില് എത്തിയെന്നാണ് വിവരം. ഇതേ തുടർന്നു സംസ്ഥാന പോലീസ് മേധാവി ലോകനാഥ് ബെഹ്റ ജില്ലാ പോലീസ് മേധാവികള്ക്ക് ഇത് സംബന്ധിച്ച് നിര്ദ്ദേശം നല്കി. ബസ്സ് സ്റ്റാന്റുകള്, റെയില്വേ സ്റ്റേഷനുകള്, വിമാനത്താവളങ്ങള് എന്നിവിടങ്ങളിലും ജനങ്ങള് കൂടുന്ന മറ്റ് സ്ഥലങ്ങളിലും ജാഗ്രത പുലര്ത്താന് നിര്ദ്ദേശമുണ്ട്. ആരാധനാലയങ്ങള്ക്ക് ചുറ്റും നിരീക്ഷണവും സുരക്ഷയും ശക്തമാക്കും. തമിഴ്നാടുമായി അതിര്ത്തി പങ്കിടുന്ന ജില്ലകളിലും പരിശോധന കര്ശനമാക്കും. സംശയാസ്പദമായ സാഹചര്യങ്ങളോ വസ്തുക്കളോ ശ്രദ്ധയില്പ്പെട്ടാല് 112 എന്ന നമ്പറിലോ സംസ്ഥാന പോലീസ് മേധാവിയുടെ കണ്ട്രോള് റൂമിലോ (0471 2722500) അറിയിക്കണമെന്ന് അദ്ദേഹം പൊതുജനങ്ങളോട് അഭ്യര്ത്ഥിച്ചു.
