തൃശൂർ - ബീഫ് ഫെസ്റ്റ് നടത്തിയ കേസിൽ കോൺഗ്രസ്സ് നേതാക്കളെ കോടതി ശിക്ഷിച്ചു. ബീഫ് വിവാദത്തെ തുടർന്ന് കൊടുങ്ങല്ലൂരിൽ ബീഫ് ഫെസ്റ്റ് നടത്തിയ സംഭവത്തിലാണ് എട്ട് കോൺഗ്രസ്സ് നേതാക്കൾക്ക് എഴുന്നൂറ് രൂപ പിഴയും, കോടതി പിരിയും വരെ തടവും ശിക്ഷ വിധിച്ചത്. അനുമതിയില്ലാതെ സംഘം ചേർന്നു എന്നായിരുന്നു ഇവർക്കെതിരെയുള്ള കേസ്.
2017 ജൂലൈ 17നാണ് കേസിനാസ്പദമായ സംഭവം നടന്നത്. ബീഫ് ഫെസ്റ്റിന് നേതൃത്വം നൽകിയ ഡി സി സി മെംബർ വേണു വെണ്ണറ, കോൺഗ്രസ്സ് മണ്ഡലം പ്രസിഡന്റ് ഡിൽഷൻ കൊട്ടേക്കാട്, യൂത്ത് കോൺഗ്രസ്സ് മണ്ഡലം പ്രസിഡന്റ് നിഷാഫ് കുര്യാപ്പിള്ളി, കോൺഗ്രസ് നേതാക്കളായ ടി.എസ് സുദർശൻ, കെ.പി സുനിൽ കുമാർ, പ്രദീപ്, നൗഷാദ്, യൂത്ത് കോൺഗ്രസ്സ് നേതാക്കളായ റുവിൻ വിശ്വം, പ്രസീൺ എന്നിവരെയാണ് കൊടുങ്ങല്ലൂർ ഒന്നാം ക്ലാസ്സ് മജിസ്‌ട്രേട്ട് എൽദോ മാത്യു ശിക്ഷിച്ചത്.
