വാൻകൂവർ- യാത്രക്കിടെ ആകാശച്ചുഴിയിൽ പെട്ട് വിമാനം കുലുങ്ങി യാത്രികർക്ക് പരിക്ക്. കാനഡയിലെ വാൻകൂവറിൽനിന്നു സിഡ്നിയിലേക്കു പോയ എയർ കാനഡ വിമാനമാണ് അപകടത്തിൽ പെട്ടത്. അപകടത്തെ തുടർന്ന് വിമാനം അടിയന്തിരമായി ഹൊനോലുലു വിമാനത്താവളത്തിൽ ഇറക്കി. 9 പേരുടെ പരിക്ക് ഗുരുതരമാണെന്നാണ് റിപ്പോർട്ടുകൾ
ഹവായി പിന്നിട്ട ഉടനെയാണ് 36000 അടി ഉയരത്തിൽ വെച്ച് വിമാനം അതി ശക്തമായി ഇളകിയത്. 284 യാത്രക്കാരാണു ബോയിംഗ് 777-200 വിമാനത്തിലുണ്ടായിരുന്നത്. ഇതേതുടർന്ന് വിമാനം ഹവായിയിലേക്കു തന്നെ തിരിച്ചുവിടുകയായിരുന്നു. വിമാനം ഇളകവെ യാത്രക്കാരിൽ മിക്കവരും വിമാനത്തിന്റെ മേൽക്കൂരയിൽ ഇടിച്ചെന്നും പിന്നീട് നിലത്തുവീണെന്നും യാത്രക്കാർ പറഞ്ഞു. വിമാനത്തിനുള്ളിൽ യാത്രക്കാർ പറക്കുന്ന അവസ്ഥയാണ് ഉണ്ടായതെന്നു യാത്രക്കാരി ജെസ് സ്മിത്ത് പറഞ്ഞു.