കോഴിക്കോട്- റോഡ് ഷോയിലെ വാഹനത്തിന് പിറകെ ഓടിയ സ്നേഹയെയും സാൻജോയെയും ചേർത്തുപിടിച്ച് രാഹുൽ ഗാന്ധി. വയനാട്ടിൽ വോട്ടർമാർക്ക് നന്ദി പറയാനെത്തിയ രാഹുൽ ഗാന്ധിയുടെ റോഡ് ഷോയിൽ രാഹുലിന്റെ വാഹനത്തിന് പിറകെയായിരുന്നു സാൻജോയും സ്‌നേഹയും ഓടിയത്. രാഹുൽ ഗാന്ധി എന്ന് ഉറക്കെ വിളിച്ചായിരുന്നു ഇരുവരുടെയും ഓട്ടം. ഇക്കാര്യം ശ്രദ്ധയിൽപ്പെട്ട രാഹുൽ ഇരുവരെയും അടുത്തുവിളിച്ചു ചേർത്തുനിർത്തുകയായിരുന്നു.
പി.സി വിഷ്ണുനാഥിന്റെ പോസ്റ്റ്:
കൽപ്പറ്റയിൽ നിന്നും റോഡ് ഷോ ആരംഭിച്ചത് മുതൽ രാഹുൽഗാന്ധി സഞ്ചരിക്കുന്ന വാഹനത്തിന്റെ പിറകിൽ ഓടുകയായിരുന്നു സ്‌നേഹയും സാൻജോയും. കുറേ ദൂരം ഓടിയതിനുശേഷം ചിലപ്പോഴൊക്കെ വാഹനത്തിന്റെ മുന്നിലെത്തും; ഉറക്കെ രാഹുൽഗാന്ധിയെന്ന് വിളിക്കും. അങ്ങനെയാണ് ഇവർ രാഹുൽജിയുടെ ശ്രദ്ധയിൽപ്പെടുന്നത് . തുടക്കം മുതൽ കൂടെ ഓടുകയായിരുന്നു എന്ന് ഞാൻ അദ്ദേഹത്തോട് പറഞ്ഞു . അദ്ദേഹം വാഹനത്തിൽ നിന്നു കൊണ്ട് അടുത്തേക്ക് വരാൻ അവരോട് ആവശ്യപ്പെട്ടു.
അത്ഭുതത്തോടെ സ്‌നേഹയും സാൻജോയും.
വാഹനത്തിനടുത്തേക്ക് വന്ന സ്നേഹയെയും സാന്‍ജോയെയും സുരക്ഷാ ഉദ്യോഗസ്ഥർ തടയാൻ ശ്രമിച്ചപ്പോൾ അദ്ദേഹം തന്നെ പറഞ്ഞു അവരെ വാഹനത്തിലേക്ക് കടത്തിവിടാൻ. വാഹനത്തിനകത്തു കയറിയ രണ്ടുപേർക്കും അത്ഭുതം; തൊട്ടടുത്ത് നിൽക്കുന്നത് രാഹുൽഗാന്ധി; ചേർത്തുനിർത്തി ചിത്രവുമെടുത്തു.
