കല്‍പറ്റ- പഴയ വൈത്തിരിയില്‍നിന്നു രണ്ടു കിലോമീറ്റര്‍ മാറി വനത്തോടുചേര്‍ന്നു കാപ്പിത്തോട്ടത്തില്‍ കാട്ടാന പ്രസവിച്ചു. സുരക്ഷയൊരുക്കി തോട്ടത്തിലും സമീപത്തുമായി നിലയുറപ്പിച്ചത് 11 ആനകള്‍. മുള്ളന്‍പാറ പഴയ വി.കെ പ്ലാന്റേഷന്റെ ഭാഗമായ കാപ്പിത്തോട്ടത്തിലായിരുന്നു കാട്ടാനയുടെ പ്രസവം. തോട്ടത്തില്‍ നിലയുറപ്പിച്ച കാട്ടാനക്കൂട്ടത്തിനിടയില്‍ മണിക്കൂറുകള്‍ മാത്രം പ്രായമുള്ള കുട്ടിയാന ശനിയാഴ്ച രാവിലെയാണ് നാട്ടുകാരുടെ ശ്രദ്ധയില്‍പ്പെട്ടത്. മുള്ളന്‍പാറയില്‍ പതിവായി ഇറങ്ങുന്ന കൂട്ടത്തില്‍പ്പെട്ട ആനയാണ് പ്രസവിച്ചതെന്നു പ്രദേശവാസികള്‍ പറഞ്ഞു.
മുള്ളന്‍പാറ തോട്ടത്തില്‍ നിലയുറപ്പിച്ച കാട്ടാനക്കൂട്ടം.
ബാലാരിഷ്ടത നീങ്ങിയ നാല് കുട്ടിയാനകള്‍ ഉള്‍പ്പെടുന്നതാണ് തോട്ടത്തിലുള്ള കൂട്ടം. കാപ്പിത്തോട്ടത്തോടു ചേര്‍ന്നുള്ള ചെങ്കുത്തായ തേയിലക്കാടും മറികടന്നുവേണം ആനകള്‍ക്കു വനത്തിലെത്താന്‍. കുട്ടിയാനക്കു കയറ്റം കയറാന്‍ പ്രാപ്തിയാകുംവരെ കൂട്ടം തോട്ടത്തിലും സമീപത്തുമായി നിലയുറപ്പിക്കാനാണ് സാധ്യതയെന്നു വനപാലകര്‍ പറഞ്ഞു. ആനക്കൂട്ടം വനപാലകരുടെ നിരീക്ഷണത്തിലാണ്. ആളുകള്‍ ആനകള്‍ക്കടുത്തേക്കു പോകുന്നതു ഒഴിവാക്കുന്നതില്‍ വനസേന ജാഗ്രത പുലര്‍ത്തുന്നുണ്ട്. എത്രയുംവേഗം ആനകളെ കാട്ടിലേക്കു തുരത്താനാണ് വനപാലകരുടെ പദ്ധതി.
