ന്യൂദല്ഹി-മുസ്ലീങ്ങളെയും ക്രിസ്ത്യാനികളെയും നിര്ബന്ധിതമായി വന്ധ്യംകരിക്കണമെന്ന വിവാദ പ്രസ്താവനയുമായി ഹിന്ദു മഹാസഭ നേതാവ്. ഹിന്ദു മഹാ സഭ ദേശീയ വൈസ് പ്രസിഡന്റ് സാധ്വി ദേവ താക്കൂറാണ് വിവാദ പരാമര്ശവുമായി രംഗത്ത് വന്നത്. മുസ്ലീങ്ങളുടെയും ക്രിസ്ത്യാനികളുടെയും ജനസംഖ്യ ക്രമാതീതമായി അധികരിക്കുന്നുവെന്നും അത് ഹിന്ദുക്കള്ക്ക് ഭീഷണിയാണെന്നും ഇവര് പറഞ്ഞു.''മുസ്ലിങ്ങളുടെയും ക്രിസ്താനികളുടെയും ജനസംഖ്യ നാള്ക്കു നാള് വര്ദ്ധിച്ചു വരികയാണ്. ഇത് നിയന്ത്രിക്കാന് കേന്ദ്രം നിര്ബന്ധിതമായി അവരെ വന്ധ്യംകരിക്കണം. അങ്ങനെ ചെയ്താല് അവര്ക്ക് എണ്ണം അധികരിപ്പിക്കാന് കഴിയില്ല'' സാധ്വി ദേവ പറഞ്ഞു. ഒപ്പം ലോകത്ത് ഒരു പ്രഭാവമുണ്ടാക്കുന്നതിനായി ഹിന്ദുക്കള് കൂടുതല് കുട്ടികള്ക്ക് ജന്മം നല്കണമെന്നും അവര് കൂട്ടിച്ചേര്ത്തു.ഇതോടൊപ്പം, ഹിന്ദു ദൈവങ്ങളുടെ വിഗ്രഹങ്ങള്പള്ളികളില് സ്ഥാപിക്കണമെന്നും അവര് പറഞ്ഞു.ദേശാഭിമാനിയായ നാഥുറാം ഗോഡ്സേയുടെ പ്രതിമ സ്ഥാപിക്കണമെന്നും സാധ്വി ദേവ പറഞ്ഞു.
