തിരുവനന്തപുര-ശ്രീലങ്കയുടെ തെക്കുകിഴക്ക് രൂപംകൊള്ളുന്ന ന്യൂനമര്ദം തമിഴ്നാട് തീരത്ത് ഫാനി ചുഴലിക്കാറ്റായി മാറാന് സാധ്യതയുണ്ടെന്ന് ഇന്ത്യന് കാലാവസ്ഥാ വകുപ്പ് മുന്നറിയിപ്പ് നല്കി. കേരളത്തെ നേരിട്ട് ബാധിക്കില്ലെങ്കിലും 29, 30, മേയ് ഒന്ന് തീയതികളില് വ്യാപകമായ മഴയ്ക്കും ശക്തമായ കാറ്റിനും സാധ്യതയുണ്ട്. ദക്ഷിണേന്ത്യയില് ശക്തമായ മഴയാണ് പ്രവചിക്കുന്നത്.
ന്യൂനമര്ദം രൂപപ്പെടുന്ന സാഹചര്യത്തില് 27 മുതല് മത്സ്യബന്ധനം വിലക്കിയിട്ടുണ്ട്. ഇന്ത്യന് മഹാസമുദ്രത്തിന്റെ ഭൂമധ്യരേഖാപ്രദേശത്തും അതിന് പടിഞ്ഞാറുള്ള തെക്കുപടിഞ്ഞാറന് ബംഗാള് ഉള്ക്കടലിലും തമിഴ്നാടുതീരത്തും മത്സ്യബന്ധനത്തിന് പോകരുത്. 27-ന് പുലര്ച്ചെ 12 മണിയോടെ മത്സ്യത്തൊഴിലാളികള് ഏറ്റവും അടുത്തുള്ള തീരത്തെത്തണമെന്നും മുന്നറിയിപ്പില് പറയുന്നു.
വ്യാഴാഴ്ച രാത്രി 11.30 വരെ തീരത്ത് തിരമാലകള് ഒന്നര മീറ്റര് മുതല് 2.2 മീറ്റര്വരെ ഉയരാന് സാധ്യതയുണ്ട്. കടല് പ്രക്ഷുബ്ധമാകും.
വ്യാഴാഴ്ച കാറ്റിന്റെ വേഗത മണിക്കൂറില് 30-40 കിലോമീറ്ററാകും. 28-ന് 80-90 കിലോമീറ്റര് വേഗം കൈവരിക്കാം. തമിഴ്നാട് തീരത്ത് 40-50 കിലോമീറ്ററായിരിക്കും വേഗത. 30-ന് -ന്യൂനമര്ദം ചുഴലിക്കാറ്റായി തമിഴ്നാട് തീരം കടക്കുമെന്നാണ് കരുതുന്നത്.
