മലപ്പുറം- ഇസ്ലാം സ്വീകരിച്ചതിന്റെ പേരില് കൊലപ്പെടുത്തിയ കൊടിഞ്ഞി ഫൈസലിന്റെ സഹോദരി പുത്രന്മാര്ക്കെതിരെ വധഭീഷണി മുഴക്കിയ ആര്എസ്എസ് പ്രവര്ത്തകനെതിരെ ജാമ്യമില്ലാ വകുപ്പ് ചുമത്തി കേസെടുത്തു. കൊടിഞ്ഞി ഫാറുഖ് നഗര് പൊന്നാട്ടില് ബൈജുവിനെതിരെയാണ് തിരുരങ്ങാടി പോലീസ് കേസെടുത്തത്. ഫൈസലിന്റെ സഹോദരിയും മകനും തിരൂരങ്ങാടി സിഐക്ക് പരാതി നല്കിയിരുന്നു.
കഴിഞ്ഞ ദിവസം രാത്രി പള്ളിയില്നിന്ന് നമസ്കാരം കഴിഞ്ഞ് തിരിച്ച് വരുമ്പോഴായിരുന്നു സഹോദരി പുത്രന്മാര്ക്കെതിരെ ബിജുവും സംഘവും വധഭീഷണി മുഴക്കിയത്. കുട്ടികളെ വധിക്കുമെന്നും എല്ലാറ്റിനേയും നുള്ളിക്കളയുമെന്നുമായിരുന്നു ഭീഷണി. ഫൈസലിന്റ കൊലപാതകവുമായി ബന്ധപ്പെട്ട് ഇയാളെ തിരൂരങ്ങാടി പോലിസ് നേരത്തെ ചോദ്യം ചെയ്തിരുന്നു.
കൊടിഞ്ഞിയില് വിവിധ പാര്ട്ടി പ്രതിനിധികള് പങ്കെടുത്ത സമാധാന യോഗം നടന്നു. ആര്.ടി.ഒയുടെ നേതൃത്വത്തില് നടന്ന യോഗത്തില് മഹല്ലു ഭാരവാഹികളും പങ്കെടുത്തു. കഴിഞ്ഞ വര്ഷം നവംബര് 16നാണ് തിരൂരങ്ങാടി കൊടിഞ്ഞിയില് അനില്കുമാറെന്ന ഫൈസല് കൊല്ലപ്പെട്ടത്.
