തിരുവനന്തപുരം- കൃഷിക്കാര് എടുത്ത എല്ലാ വായ്പകള്ക്കും 2019 ഡിസംബര് 31 വരെ സര്ക്കാര് മൊറട്ടോറിയം പ്രഖ്യാപിച്ച സാഹചര്യത്തില് എല്ലാവിധ ജപ്തി നടപടികളും നിര്ത്തിവെയ്ക്കണമെന്ന് മുഖ്യമന്ത്രി പിണറായി വിജയന് സ്റ്റേറ്റ് ലെവല് ബാങ്കേഴ്സ് കമ്മിറ്റി (എസ്.എല്.ബി.സി) പ്രതിനിധികളുടെ യോഗത്തില് ആവശ്യപ്പെട്ടു. ഇതനുസരിച്ച് ജപ്തി നടപടികള് സോപാധികമായി നിര്ത്തിവെക്കാന് തീരുമാനമായി.
കൃഷി പുനരാരംഭിക്കുന്നതിന് കര്ഷകര്ക്ക് പുതിയ വായ്പ നല്കുന്നതിന് എസ്.എല്.ബി.സി അംഗബാങ്കുകളോട് നിര്ദേശിക്കും. പുതിയ വായ്പക്ക് ഒരു വര്ഷത്തെ പലിശ സര്ക്കാര് നല്കുമെന്ന് തീരുമാനിച്ചിട്ടുണ്ട്. കാര്ഷിക വായ്പയുടെ പലിശ നിരക്ക് 9 ശതമാനമായി നിജപ്പെടുത്തണമെന്ന നിര്ദേശം യോഗം അംഗീകരിച്ചു. കാര്ഷിക കടാശ്വാസ കമ്മീഷന്റെ പരിധിയില് വാണിജ്യ ബാങ്കുകളെ ഉള്പ്പെടുത്താനുള്ള സര്ക്കാര് തീരുമാനത്തോട് അനുകൂലമായാണ് ബാങ്ക് പ്രതിനിധികള് പ്രതികരിച്ചത്.
അടിയന്തരമായി എസ്.എല്.ബി.സിയുടെ ഔപചാരിക യോഗം വിളിച്ചുചേര്ത്ത് മുഖ്യമന്ത്രിയുമായി നടത്തിയ ചര്ച്ചയുടെ അടിസ്ഥാനത്തില് തുടര് നടപടികളെടുക്കാന് തീരുമാനിച്ചു. ചില സാങ്കേതിക കാര്യങ്ങളില് റിസര്വ് ബാങ്ക് ഓഫ് ഇന്ത്യയുടെ കൂടി അനുമതി ആവശ്യമായിവരുന്ന സാഹചര്യത്തില് എസ്.എല്.ബി.സിയും സര്ക്കാരും ഈ കാര്യങ്ങള് ആര്.ബി.ഐയുടെ ശ്രദ്ധയില് പെടുത്തും.
കൃഷിക്കാരുടെ പ്രയാസം മനസ്സിലാക്കി അവര്ക്ക് ആശ്വാസം പകരുന്ന സമീപനം ബാങ്കുകളില് നിന്ന് ഉണ്ടാകണമെന്ന് മുഖ്യമന്ത്രി പറഞ്ഞു.
