റിയാദ് - സൗദി പൗരന്മാർക്ക് ആകർഷകമായ പ്രത്യേക തൊഴിൽ മേഖലകളിൽ സൗദിവൽക്കരിക്കണം ഉയർത്തുന്നതിനുള്ള പദ്ധതി തൊഴിൽ, സാമൂഹിക വികസന മന്ത്രാലയവും അനുബന്ധ സ്ഥാപനങ്ങളും ചേർന്ന് ആരംഭിച്ചു.
സൗദിവൽക്കരണം നടപ്പാക്കുന്നതിന് സ്വകാര്യ സ്ഥാപനങ്ങളെ പ്രോത്സാഹിപ്പിക്കുന്നതിനുള്ള പദ്ധതികളുടെ ഭാഗമായാണിത്. സൗദികൾക്ക് ആകർഷകമായ തൊഴിൽ മേഖലകളിൽ നിശ്ചിത ശതമാനം സൗദിവൽക്കരണം നിർണയിച്ച് സ്വദേശിവൽക്കരണം വർധിപ്പിക്കുന്നതിനാണ് പുതിയ പദ്ധതിയിലൂടെ ലക്ഷ്യമിടുന്നത്.
യോഗ്യരായ സൗദി പൗരന്മാർക്കും പുതുതായി ബിരുദം നേടി പുറത്തിറങ്ങുന്നവർക്കും സൗദിവൽക്കരണ പദ്ധതിയുമായി സഹകരിക്കുന്ന സ്ഥാപനങ്ങൾക്കും പുതിയ പദ്ധതി ഉപകാരപ്പെടുമെന്ന് തൊഴിൽ, സാമൂഹിക വികസന മന്ത്രാലയം വ്യക്തമാക്കി. ഉദ്യോഗാർഥികളായ സൗദികൾക്ക് ആകർഷകമായ തൊഴിലുകൾ സൗദിവൽക്കരിക്കുന്നതിന് പദ്ധതി ഊന്നൽ നൽകും. പദ്ധതി നടപ്പാക്കുന്നതിന് സഹകരിക്കുന്ന സ്ഥാപനങ്ങൾക്ക് തൊഴിൽ, സാമൂഹിക വികസന മന്ത്രാലയവും അനുബന്ധ സ്ഥാപനങ്ങളും പ്രോത്സാഹനങ്ങളും നൽകും. മാനവശേഷി വികസന നിധി, ജനറൽ ഓർഗനൈസേഷൻ ഫോർ സോഷ്യൽ ഇൻഷുറൻസ്, സാമൂഹിക വികസന ബാങ്ക് അടക്കമുള്ള സ്ഥാപനങ്ങളുമായി സഹകരിച്ച് പദ്ധതി വിജയിപ്പിക്കുന്നതിന് പ്രവർത്തിക്കുമെന്ന് തൊഴിൽ, സാമൂഹിക വികസന മന്ത്രാലയം പറഞ്ഞു.
