കൊച്ചി-സംസ്ഥാന ബജറ്റില്‍ സിനിമാ ടിക്കറ്റുകള്‍ക്ക് പ്രഖ്യാപിച്ച വിനോദ നികുതിയില്‍ ഇളവുവരുത്തിയേക്കും. ചലച്ചിത്രപ്രവര്‍ത്തകര്‍ കൊച്ചിയില്‍ മുഖ്യമന്ത്രിയുമായി നടത്തിയ ചര്‍ച്ചയിലാണ് ഉറപ്പ് ലഭിച്ചത്. നികുതി 10 ശതമാനത്തില്‍ നിന്ന് കുറയ്ക്കുന്ന കാര്യം പരിഗണിക്കാമെന്ന് മുഖ്യമന്ത്രി ഉറപ്പുനല്‍കിയതായി ഫെഫ്ക ഭാരവാഹികള്‍ പറഞ്ഞു.
ഫെഫ്ക ഭാരവാഹികള്‍ എറണാകുളം ഗസ്റ്റ് ഹൗസിലാണ് മുഖ്യമന്ത്രിയെ നേരില്‍ കണ്ട് നിവേദനം സമര്‍പ്പിച്ചത്. സിനിമാ ടിക്കറ്റുകള്‍ക്ക് പത്ത് ശതമാനം വിനോദനികുതി ഏര്‍പ്പെടുത്തിയത് സിനിമാവ്യവസായത്തെ സാരമായി ബാധിക്കുമെന്ന് ഫെഫ്കയടക്കമുള്ള സംഘടനകള്‍ നേരത്തെ ചൂണ്ടിക്കാട്ടിയിരുന്നു. ജി.എസ്.ടി നിലനില്‍ക്കെ ഇരട്ടനികുതി ഏര്‍പെടുത്തുന്നത് നീതീകരിക്കിനാകില്ലെന്നതാണ് വിവിധ സിനിമാസംഘടനകള്‍ വയ്ക്തമാക്കുന്നത്.
