ഗുവാഹതി- എം.എസ്.എഫ് ദേശീയ കമ്മിറ്റിയുടെ 'നയി ദിശ നയാ രാസ്ത' സ്‌കൂൾ പ്രവേശന കാമ്പയിന് അസമിൽ തുടക്കം. സംസ്ഥാന തല ഉദ്ഘാടനം ദേശീയ പ്രസിഡന്റ് ടി.പി.അഷ്‌റഫലി നിർവഹിച്ചു. ജനുവരിയിലാണ് അസമിൽ അധ്യയന വർഷം ആരംഭിക്കുന്നത്. ഗുവാഹതി ഹടിഗൗണിലെ ഹസ്‌റത് അഹ്മദ് അലി കാമ്പസിൽ നടന്ന ചടങ്ങിൽ അസം സംസ്ഥാന എം.എസ്.എഫ് പ്രസിഡന്റ് തൗസീഫ് ഹുസൈൻ റാസ അധ്യക്ഷത വഹിച്ചു.
ഉത്തരേന്ത്യയിലെ മുസ്‌ലിം വിദ്യാർഥികളുടെ സ്‌കൂൾ എൻറോൾമെന്റ് വർധിപ്പിക്കുന്നതിനും കൊഴിഞ്ഞുപോക്ക് തടയുന്നതിനുമായി എം.എസ്.എഫ് ദേശീയ കമ്മിറ്റി ആവിഷ്‌കരിച്ച വിവിധ പരിപാടികളുടെ ഭാഗമാണ് കാമ്പയിൻ. സാമൂഹിക, സാമ്പത്തിക പരാധീനതകൾ മൂലം വിദ്യാഭ്യാസത്തിന് അവസരം ലഭിക്കാത്ത കുട്ടികളെ സ്‌കൂൾ കിറ്റുകളും മറ്റു സഹായങ്ങളും നൽകി സ്‌കൂളിൽ എത്തിക്കുന്ന പദ്ധതിയാണ് നയി ദിശ നയാ രാസ്ത. ഖത്തർ കെ.എം.സി.സിയുടെ സഹകരണത്തോടെ രണ്ട് വർഷമായി പശ്ചിമ ബംഗാൾ, ഉത്തർ പ്രദേശ്, ബിഹാർ, ജാർഖണ്ഡ്, പഞ്ചാബ്, ദൽഹി, തെലങ്കാന, ഹരിയാന, മഹാരാഷ്ട്ര തുടങ്ങിയ സംസ്ഥാനങ്ങളിൽ പദ്ധതി നടന്നുവരുന്നുണ്ടെന്ന് എം.എസ്.എഫ് അറിയിച്ചു.
ചടങ്ങിൽ എം.എസ്.എഫ് ദേശീയ സെക്രട്ടറി ഇ. ഷമീർ, അസം സോണൽ സെക്രട്ടറി സുഹൈൽ ഹുദവി, സൗദി കെ.എം.സി.സി സെക്രട്ടറിയേറ്റംഗം സി.കെ.ശാക്കിർ, ഹുസൈൻ റാസ, അഡ്വ.ജുനൈദ് ഖാലിദ് എന്നിവർ പ്രസംഗിച്ചു.
