ടിക് ടോക് ഉള്‍പ്പെടെയുള്ള സാമൂഹ്യ മാധ്യങ്ങള്‍ ഉപയോഗിക്കുമ്പോള്‍ സഭ്യതയും മാന്യതയും പുലര്‍ത്തണമെന്ന് മുന്നറിപ്പുമായി കേരളാ പൊലീസ് രംഗത്ത്. ടിക്ക് ടോക്കിലൂടെ തെറിവിളിയും, ഭീഷണിയും വ്യക്തി ഹത്യയും നടത്തുന്ന തരത്തിലുള്ള ദൃശ്യങ്ങള്‍ പുറത്തുവന്നതിന് പിന്നാലെയാണ് കേരളാ പൊലീസ് നിര്‍ദേശവുമായി രംഗത്തെത്തിയത്.
ടിക് ടോക്കിലെ വീഡിയോകള്‍ പലപ്പോഴും അതിരു കടക്കുന്നതായി നേരത്തെ തന്നെ വിമര്‍ശനങ്ങള്‍ ഉയര്‍ന്നിരുന്നു. വ്യക്തികളെ അതിക്ഷേപിക്കുന്നതും അശ്ലീലതയും അസബ്യവും പ്രചരിപ്പിക്കുന്നതുമായ വീഡിയോകള്‍ അടുത്തിടെ സാമൂഹ്യ മാധ്യമങ്ങളിലൂടെ വൈറലായിരുന്നു. ഇതു ചൂണ്ടിക്കാട്ടിയാണ് കേരള പൊലീസ് തങ്ങളുടെ ഫെയ്‌സ്ബുക്ക് പേജിലൂടെ ട്രോള്‍ വീഡിയോ പുറത്തുവിട്ടത്.
'അതിരുകടക്കുന്ന ഇത്തരം പ്രവണതകള്‍ കലുഷിതമായ സാമൂഹിക അവസ്ഥയാണ് സൃഷ്ടിക്കുന്നത്. സമൂഹ മാധ്യമങ്ങള്‍ ഉപയോഗിക്കുമ്പോള്‍ സഭ്യതയും മാന്യതയും പുലര്‍ത്തുക തന്നെ വേണം. ശ്രദ്ധയോടെ, പരസ്പര ബഹുമാനത്തോടെയാകട്ടെ നമ്മുടെ ഇടപെടലുകള്‍' എന്ന് കേരളാ പൊലീസ് ഫെയിസ്ബുക്കില്‍ കുറിച്ചു.
