കാഞ്ഞങ്ങാട്- സമൂഹ മാധ്യമങ്ങളില്‍ വനിതാ മതിലിനെ അനുകൂലിച്ച് രംഗത്തുവന്ന മുസ്ലിം ലീഗ് നേതാവും ലോയേഴ്‌സ് ഫോറം മുന്‍ ജില്ലാ പ്രസിഡന്റുമായ സി.ഷുക്കൂറിനെ പാര്‍ട്ടിയുടെ പ്രാഥമിക അംഗത്വത്തില്‍ നിന്നു പുറത്താക്കി. കഴിഞ്ഞ ദിവസം കാഞ്ഞങ്ങാട്ടെത്തിയ സി.പി.എം കണ്ണൂര്‍ ജില്ലാ സെക്രട്ടറി പി.ജയരാജനുമായി നടത്തിയ കൂടിക്കാഴ്ചയും നടപടിക്ക് കാരണമായതായി പറയുന്നു. സമീപഭാവിയില്‍ ഒരു പാര്‍ട്ടിയുടെയും അംഗത്വം എടുക്കാന്‍ താന്‍ ഉദ്ദേശിക്കുന്നല്ലെന്ന് ഫേസ് ബുക്കില്‍ എഴുതിയ കുറിപ്പില്‍ ഷുക്കൂര്‍ പറയുന്നു.
അതേസമയം, ജില്ലാ കൗണ്‍സില്‍ അംഗമായ ഷുക്കൂറിനെ നേരത്തെ തന്നെ പുറത്താക്കിയിരുന്നുവേന്ന് ലീഗ് ജില്ലാ പ്രസിഡന്റ് എം.സി.ഖമറുദ്ദീന്‍ അവകാശപ്പെട്ടു. വാര്‍ഷിക കൗണ്‍സില്‍ യോഗത്തില്‍ ഷുക്കൂറിനെ പാര്‍ട്ടി ക്ഷണിച്ചിരുന്നില്ലെന്നും പാര്‍ട്ടി പരിപാടികളില്‍ പങ്കെടുപ്പിക്കാറില്ലെന്നും അദ്ദേഹം പറഞ്ഞു.
ഷുക്കൂറിന്റെ ഭാര്യയും എം.ജി സര്‍വകലാശാലാ മുന്‍ പ്രൊ വൈസ് ചാന്‍സലറായ ഡോ. ഷീനാ ഷുക്കൂര്‍ കഴിഞ്ഞ നവംബറില്‍ സി.പി.എം വേദി പങ്കിട്ടത് പാര്‍ട്ടിയില്‍ വിവാദമായിരുന്നു.
ഇന്നലെ രാത്രി സി.ഷുക്കൂര്‍ ഫേസ് ബുക്കില്‍ എഴുതിയ കുറിപ്പ്
മുസ്ലിം ലീഗിന്റെ പ്രാഥമിക അംഗത്വത്തില്‍ നിന്നും എന്നെ നീക്കിയെന്നറിയിച്ചു കൊണ്ടു ജില്ലാ മുസ്ലിം ലീഗ് കമ്മിറ്റിയുടെ മെയില്‍ വന്നതായി ഒരു പത്ര പ്രവര്‍ത്തക സുഹൃത്ത് വിളിച്ചു പറഞ്ഞു. (എനിക്ക് ആ വിവരം കിട്ടിയിട്ടില്ല)
വാര്‍ത്തയുടെ നിജസ്ഥിതി എന്തായാലും , ഇനി ഞാന്‍ കക്ഷി രാഷ്ട്രീയത്തിലേക്കു ഇല്ല. സമീപ ഭാവിയില്‍ ഒരു രാഷ്ട്രീയ കക്ഷിയുടെയും അംഗത്വമെടുക്കുവാന്‍ ഉദ്ദേശിക്കുന്നുമില്ല. എന്നാല്‍ , പൊതു രംഗത്ത് തുടരും. കക്ഷി രാഷ്ട്രീയത്തിനപ്പുറം ദലിത്, ന്യൂനപക്ഷ , സ്ത്രീ പക്ഷ , മനുഷ്യാവകാശ നിലപാടുകള്‍ ഉറക്കെ പറയും . അതിനു വേണ്ടി നിലകൊള്ളും.
കേരളീയ സാഹചര്യത്തില്‍ , നവോത്ഥാന മൂല്യങ്ങളെ ഉയര്‍ത്തി പിടിച്ചു , ജെന്‍ഡര്‍ ഇക്വാലിറ്റിക്കു വേണ്ടി , സെക്യുലര്‍ സ്‌പേസിനു വേണ്ടി തുടര്‍ന്നും നിലകൊള്ളും. എന്റെ മാപ്പിള സ്വത്വം ഉച്ചത്തില്‍ വിളിച്ചു പറയും...
കാസര്‍ഗോഡ് ജില്ലയില്‍ , മുസ്ലിം ന്യൂനപക്ഷങ്ങള്‍ക്കിടയില്‍ , പിന്നോക്ക വിഭാഗങ്ങള്‍ക്കിടയില്‍ അവരുടെ സംസ്‌കാരവും കലയും സ്‌നേഹവും പങ്കുവെച്ചു, കൂടുതല്‍ ഇതര സമൂഹള്‍ക്കിടയില്‍ അടുപ്പവും ചേര്‍ച്ചയും ഉണ്ടാക്കുവാനുള്ള ശ്രമം തുടരും.
ഇങ്ങിനെ സാംസ്‌കാരിക പ്രവര്‍ത്തനം ഏകോപിപ്പിക്കുവാന്‍ ഒരു സാംസ്‌കാരിക കൂട്ടായ്മ ആഗ്രഹിക്കുന്നു. അതിനായി ചെറിയ ശ്രമം തുടങ്ങും.
നമുക്കു ജീവ വായു പോലെ പ്രധാനമാണ് സ്‌നേഹവും സൗഹൃദവും മനുഷ്യ പറ്റും. മനുഷ്യര്‍ക്കിടയില്‍ നന്മയുടെ അനേകം വിത്തുകള്‍ പാകുവാന്‍ ഇനിയും ശ്രമിക്കും. ഒരിക്കല്‍ കൂടി , തല്‍ക്കാലം ഒരു രാഷ്ട്രീയ പാര്‍ട്ടിയുടെയും ഭാഗമാകുവാന്‍ ഉദ്ദേശിക്കുന്നില്ല.. എന്റെ സ്വാതന്ത്ര്യം എനിക്കു അനുവദിച്ചു തരിക
