സോനിപത്- ഹരിയാനയില്‍ സോനിപത്തില്‍ ഗൊഹാന-പാനിപത് ഹൈവേയില്‍ തെറ്റായ ദിശയില്‍ വേഗതയില്‍ സഞ്ചരിച്ച് കൂറ്റന്‍ ട്രക്ക് ഒന്നിലേറെ വാഹനങ്ങളില്‍ ഇടിച്ചുണ്ടായ അപകടത്തില്‍ 12 പേര്‍ മരിച്ചു. ഒമ്പത് പേര്‍ക്ക് പരിക്കേറ്റു. ഞായറാഴ്ച വൈകുന്നേരമാണ് അപകടമുണ്ടായത്. മാരുതി സുസുക്കി കമ്പനിയുടെ കാറുകള്‍ കയറ്റിപ്പോകുകയായിരുന്നു ട്രക്കാണ് അപകടമുണ്ടാക്കിയത്. ഒരു കാറും ഒരു ക്രൂയ്‌സര്‍ വാനുമാണ് ട്രക്കിടിച്ച് തകര്‍ന്നത്. 20ലേറെ യാത്രക്കാരെ വഹിക്കുന്ന ക്രൂയ്‌സറിലെ യാത്രക്കാരാണ് മരിച്ചവരില്‍ ഏറെയും. ട്രക്കിന്റെ നിയന്ത്രണം വിട്ടാണ് റോഡിന്റെ എതിര്‍വശത്തേക്ക് കടന്നത്. ഡിവൈഡര്‍ ഇടിച്ചു തകര്‍ത്തിട്ടുണ്ട്. അപകടത്തില്‍പ്പെട്ട കാറും ക്രൂയ്‌സറും നല്ല വേഗതയിലാണ് സഞ്ചരിച്ചിരുന്നതെന്ന് പോലീസ് പറഞ്ഞു. ട്രക്കിടിച്ച് ചതഞ്ഞ വാഹനത്തിനുള്ളില്‍ യാത്രക്കാരും മരിച്ചവരും കുടുങ്ങിക്കിടക്കുകയായിരുന്നു. പോലീസെത്തിയാണ് രക്ഷാ പ്രവര്‍ത്തനം നടത്തിയത്. പരിക്കേറ്റവരെ ഉടന്‍ റോത്തക്കിലെ ആശുപത്രിയിലേക്കു മാറ്റി.
