റിയാദ് - സൗദിയിലെ ഏറ്റവും വലിയ വ്യവസായികളിൽ ഒരാളായ ശൈഖ് അബ്ദുല്ല ബിൻ അബ്ദുൽ അസീസ് അൽറാജ്ഹി അന്തരിച്ചു. 93 വയസ്സായിരുന്നു. കിഴക്കൻ റിയാദിലെ അൽറാജ്ഹി ജുമാ മസ്ജിദിൽ ഇന്നലെ വൈകിട്ട് അസർ നമസ്‌കാരാനന്തരം മയ്യിത്ത് നമസ്‌കാരം പൂർത്തിയാക്കി മയ്യിത്ത് മറവു ചെയ്തു. ഹിജ്‌റ 1347 ൽ അൽഖസീം പ്രവിശ്യയിലെ ബുകൈരിയയിലാണ് ജനനം. പതിനേഴാം വയസ്സിൽ വ്യാപാര മേഖലയിലേക്ക് കാലെടുത്തുവെച്ചു.
സൗദിയിലെ പ്രമുഖ ഡയറി കമ്പനിയായ നാദിക്, തബൂക്ക് അഗ്രിക്കൾച്ചറൽ കമ്പനി എന്നിവയിൽ അഞ്ചു ശതമാനത്തിലേറെ ഓഹരികളുണ്ട്. സന്നദ്ധ, ജീവകാരുണ്യ പ്രവർത്തന മേഖലയിൽ സജീവമായിരുന്നു.
