കൊല്ലം- ഞായറാഴ്ച അര്‍ധരാത്രി കൊല്ലം നഗരമധ്യത്തിലെ ചിന്നക്കടയില്‍ വച്ച് ഓട്ടോ ഡ്രൈവറെ കുത്തിക്കൊലപ്പെടുത്തിയ സംഭവത്തില്‍ പ്രതികളെന്ന് സംശയിക്കുന്ന അഞ്ചു പേരെ പോലീസ് കസ്റ്റഡിയിലെടുത്തു. ജോനകപ്പുറം ചന്ദനയഴികത്ത് പുരയിടത്തില്‍ സിയാദ് എന്ന 32കാരനെയാണ് ആക്രമി സംഘം ബൈക്കില്‍ പിന്തുടര്‍ന്ന് വെട്ടിക്കൊലപ്പെടുത്തത്. സംഭവത്തിനു കാരണമായത് ഒരു പ്രവാസിയുടെ ഭാര്യയുമായുള്ള സിയാദിന്റെ അവിഹിത ബന്ധമാണെന്ന് സൂചന ലഭിച്ചിട്ടുണ്ട്. അവിവാഹിതനായ സിയാദിന് പള്ളിത്തോട്ടം സ്വദേശിയായ ഭര്‍തൃമതിയായ യുവതിയുമായി അടുപ്പമുണ്ടായിരുന്നു. യുവതിയും സിയാദും രണ്ടാഴ്ചയോളം ഒന്നിച്ചു താമസിച്ചിരുന്നു. ഭര്‍ത്താവും ബന്ധുക്കളും ചേര്‍ന്ന് യുവതിയെ തിരിച്ചു കൊണ്ടുവരികയും കൗണ്‍സിലിങ് നടത്തുകയും ചെയ്തിരുന്നു. ഇതിനു ശേഷവും യുവതി സിയാദുമായി ബന്ധം തുടര്‍ന്നതാണ് കൊലപാതകത്തില്‍ കലാശിച്ചത്. യുവതിയുടെ ബന്ധുക്കള്‍ ക്വട്ടേഷന്‍ സംഘത്തെ വിട്ട് കൊലപ്പെടുത്തിയതാണെന്നാണ് പോലീസിന്റെ നിഗമനം. യുവതിയുടെ മാതൃസഹോദരന്‍ ഉള്‍പ്പെടെ പത്തു പേര്‍ക്കെതിരെയാണ് പോലീസ് കേസെടുത്തിട്ടുള്ളത്.
ഞായറാഴ്ച രാത്രി ഓട്ടം കഴിഞ്ഞ മടങ്ങവെ രാത്രി പന്ത്രണ്ടരയോടെയാണ് സിയാദ് ആക്രമണത്തിനിരയായത്. ബൈക്കില്‍ സിയാദിന്റെ ഓട്ടോയെ പിന്തുടന്ന ആക്രമികള്‍ ചിന്നക്കട്ട ഉഷ തീയറ്റര്‍ ജങ്ഷനില്‍ വച്ചാണ് ആദ്യം ആക്രമിച്ചത്. പരിക്കേറ്റ സിയാദ് മഹാറാണി മാര്‍ക്കറ്റ് ഭാഗത്തേക്ക് വേഗത്തില്‍ ഓട്ടോ ഓടിച്ചു രക്ഷപ്പെടാന്‍ ശ്രമിക്കുന്നതിനിടെ നിയന്ത്രണം വിട്ട് ഓട്ടോ മറിഞ്ഞു. പിന്നാലെ എത്തിയ ആക്രമികള്‍ അവിടെയിട്ട് സിയാദിനെ വെട്ടിയും കുത്തിയും മരണം ഉറപ്പു വരുത്തുകയായിരുന്നു. ഓട്ടോ മറിയുന്നത് കണ്ട് അവിടെ എത്തിയ സമീപത്തെ പൂക്കടയിലുണ്ടായിരുന്ന രണ്ടു യുവാക്കളാണ് സംഭവം പോലീസിനെ അറിയിച്ചത്. പോലീസെത്തി സിയാദിനെ ജില്ലാ ആശുപത്രിയില്‍ എത്തിച്ചപ്പോഴേക്കും മരിച്ചിരുന്നു. സംഭവ സ്ഥലത്തു നിന്ന് ഹോക്കി സ്റ്റിക്കും മൊബൈലും പേഴ്‌സും പോലീസിനു ലഭിച്ചു. കഴുത്തിനേറ്റ ആഴത്തിലുള്ള വെട്ടാണ് മരണ കാരണമെന്ന് പോലീസ് പറഞ്ഞു.
