തിരൂരങ്ങാടി- ചൂടുചായ ദേഹത്തു വീണ് പൊള്ളലേറ്റ് ഒമ്പതു മാസമായ പിഞ്ചു കുട്ടി മരിച്ചു. കോട്ടക്കൽ ഇന്ത്യനൂർ ചെറ്റാരി കുന്നത്ത് ദിലീപിന്റെയും ഷിൻസിയുടെയും ഏക മകൻ ദ്രുപദ് ആണ് ചികിത്സയിലിരിക്കെ മരിച്ചത്. കഴിഞ്ഞ വ്യാഴാഴ്ച രാവിലെ മടിയിലിരുത്തി ചായ കൊടുക്കുന്നതിനിടെ സ്പൂൺ എടുക്കുന്നതിനായി കുട്ടിയെ താഴെ വെച്ചപ്പോൾ ദ്രുപദിന്റെ കാൽ പാത്രത്തിൽ തട്ടുകയായിരുന്നു. പാത്രത്തിന്റെ പിടിയിൽ ചവിട്ടേറ്റതിനാൽ ചായ കുട്ടിയുടെ ശരീരത്തിലേക്ക് മറിയുകയും പൊള്ളലേൽക്കുകയും ചെയ്തു. വെന്നിയൂർ കൊടക്കല്ലുള്ള മാതൃവീട്ടിൽ വെച്ചായിരുന്നു അപകടം. തുടർന്ന് കോഴിക്കോട്ടെ സ്വകാര്യാശുപത്രിയിൽ ചികിത്സയിലിരിക്കെ ഇന്നലെ രാവിലെയാണ് മരിച്ചത്. തിരൂരങ്ങാടി പോലീസ് ഇൻക്വസ്റ്റ് നടത്തി പോസ്റ്റ്‌മോർട്ടത്തിനായി മൃതദേഹം കോഴിക്കോട് മെഡിക്കൽ കോളജിലേക്കയച്ചു. എട്ടു വർഷത്തെ കാത്തിരിപ്പിനൊടുവിൽ ദമ്പതികൾക്ക് പിറന്ന കുട്ടിയാണ് ദ്രുപദ്.
