ന്യൂദൽഹി- ദൽഹിയിലെ സഫ്ദർജംഗ് ആശുപത്രിയിൽ രോഗി ഡോക്ടറെ മൂർച്ചയുള്ള സ്ക്രൂഡ്രൈവർ ഉപയോഗിച്ച് ആക്രമിച്ചു. നിന്നെ ഇന്ന് കൊല്ലുമെന്ന് പറഞ്ഞുകൊണ്ടായിരുന്നു ആക്രമണം. ആശുപത്രിയിലെ ഓർത്തോപീഡിക് വിഭാഗത്തിൽ ജോലി ചെയ്യുന്ന ഡോക്ടർ രാഹുൽ കനേല അത്യാഹിത വിഭാഗത്തിൽ ഡ്യൂട്ടിയിലായിരുന്നു. ഉച്ചയ്ക്ക് ഒരു മണിയോടെ രോഗി തന്റെ കൈയിൽ നിന്ന് ക്യാനുല മാറ്റാൻ ആവശ്യപ്പെട്ടു.
നഴ്‌സിംഗ് സ്റ്റാഫിന്റെ അടുത്തേക്ക് പോകാൻ ഡോക്ടർ കനേല രോഗിയോട് ആവശ്യപ്പെട്ടപ്പോൾ ഡോക്ടറെ അധിക്ഷേപിക്കാൻ തുടങ്ങിയെന്ന് കേസിൽ ഫയൽ ചെയ്ത എഫ്‌ഐആറിൽ പറയുന്നു. രോഗി തന്റെ പോക്കറ്റിൽ നിന്ന് മൂർച്ചയുള്ള സ്ക്രൂഡ്രൈവർ എടുത്ത് 26 കാരനായ ഡോക്ടറുടെ കഴുത്തിലും വയറിലും ആക്രമിക്കുകയായിരുന്നുവെന്ന് പോലീസ് പറഞ്ഞു. ആശുപത്രിയിലെ മറ്റ് ഡോക്ടർമാരും ഗാർഡുകളും ഓടിയെത്തിയാണ് രോഗിയെ പിടികൂടിയത്.
ആക്രമണത്തിൽ വലതുകൈയുടെ രണ്ട് വിരലുകൾക്ക് പരിക്കേറ്റതായി ഡോ.കനേല പറഞ്ഞു. രോഗിക്കെതിരെ നടപടി ആവശ്യപ്പെട്ടിട്ടുണ്ട്. സംഭവത്തിൽ കേസെടുത്ത് പോലീസ് അന്വേഷണം നടത്തിവരികയാണ്.
