ചെന്നൈ-സിനിമാപ്രേമികള്‍ കാത്തിരിക്കുന്ന അല്ലു അര്‍ജുന്‍ ചിത്രം 'പുഷ്പ 2' ന്റെ റിലീസ് തീയതി പ്രഖ്യാപിച്ച് നിര്‍മാതാക്കള്‍. 2024 ഓഗസ്റ്റ് 15ന് ബഹുഭാഷകളില്‍ ലോകമെമ്പാടുമുള്ള തീയറ്ററുകളില്‍ ചിത്രം റിലീസ് ചെയ്യുമെന്നാണ് റിപ്പോര്‍ട്ട്. റിലീസ് തീയതി പ്രഖ്യാപിച്ചു കൊണ്ടുള്ള പോസ്റ്ററാണ് ഇതിനോടൊപ്പം ശ്രദ്ധേയമാകുന്നത്. കഥാപാത്രത്തിന്റെ ഇടത് കൈതണ്ടയാണ് പോസ്റ്ററില്‍ കാണിച്ചിരിക്കുന്നത്. ആഭരണങ്ങള്‍ അണിഞ്ഞ് സ്ത്രീകളെപ്പോലെ നഖം വളര്‍ത്തി ചുവന്ന നെയില്‍ പോളിഷ് ഇട്ട് ചെയിനുകളും ധരിച്ചു ഇരിക്കുന്നതായാണ് പോസ്റ്ററില്‍ കാണാന്‍ സാധിക്കുന്നത്.
സമാനരീതിയില്‍ അല്ലു അര്‍ജുന്റെ ജന്മദിനത്തോട് അനുബന്ധിച്ച് 'പുഷ്പ 2'വിന്റെ ഒരു ഗ്ലിപ്സ് വീഡിയോയും ഫസ്റ്റ്ലുക്ക് പോസ്റ്ററും പുറത്ത് വന്നിരുന്നു. അര്‍ദ്ധനാരി ലുക്കിന് സമാനമായാണ് അല്ലു അര്‍ജുന്‍ ഫസ്റ്റ് ലുക്കില്‍ പ്രത്യക്ഷപ്പെട്ടത്.പട്ടുസാരി ഉടുത്ത്, സ്വര്‍ണ മാലയും വളയും മോതിരവും മുക്കുത്തിയും കമ്മലും കഴുത്തില്‍ നാരങ്ങ മാലയും പൂമാലയും വലംകൈയ്യില്‍ ഒരു തോക്കുമായി തോളും ചെരിച്ച് നില്‍ക്കുന്ന പുഷ്പരാജിന്റെ പോസ്റ്റര്‍ ട്രെന്‍ഡ് ആയി മാറുകയും ചെയ്തിരുന്നു.
